បើគិតមកដល់ពេលនេះ រយៈពេលច្រើនឆ្នាំមកហើយ ដែលអតីតតារាស្រី វ៉ាន់ ម៉ូនិច បានចាកឆ្ងាយពីសិល្បៈ ក្រោយរៀបការសាងគ្រួសារនឹងស្វាមីជាអ្នករកស៊ីមានមុខមាត់ ថែមទាំងមានងារជាឧកញ៉ាទៀតនោះ។ បច្ចុប្បន្ន ក្រោយសាងជីវិតគូយ៉ាងមានសុភមង្គល អតីតតារាស្រី វ៉ាន់ ម៉ូនិច និង ស្វាមី ក៏ទទួលបានចំណងដៃកូនប្រុសស្រីចំនួន ៣ នាក់ហើយដែរ។
ក្រោយដាច់ភឹងពីជីវិតសិល្បៈ មហាជនបានសង្កេតឃើញជីវិតអភិជនរបស់អ្នកម៉ាក់កូន ៣ ខាងលើ បើទោះជារស់នៅលើគំនរទ្រព្យដែលស្វាមីបានរៀបចំទុកដាក់ឱ្យក្តី ប៉ុន្តែ វ៉ាន់ ម៉ូនិច មិនសំងំស្ងៀមនោះឡើយ ដោយអតីតតារាស្រីក៏មានជំនួញក្នុងដៃជាឈ្មោះរបស់ខ្លួនជាច្រើនដែរ។
ក្នុងនោះ គេបានដឹងថាអតីតតារាស្រី វ៉ាន់ ម៉ូនិច គឺជាម្ចាស់សណ្ឋាគារ «មូនិចអូតែល» នៅក្រុងព្រះសីហនុ, ម្ចាស់រីស៊ត «កោះឡុងប៊ិច» នៅខេត្តកោះកុង, ម្ចាស់ហាងបញ្ចាំ «មូនិច» និង ក្រុមហ៊ុនមួយនៅខេត្តសៀមរាប។ លើសពីនោះ ថ្មីៗនេះ វ៉ាន់ ម៉ូនិច ក៏ប្រាប់គម្រោងត្រៀមបើហ្គារ៉ាស់សាំងមួយទៀតផងដែរ៕
