និយាយពីតារាស្រីរូបស្រស់ ថៃ នារីសុជាតា ហៅ ហ្វីយ៉ាតា ចាប់តាំងពីបង្ហាញវត្តមានប្រឡូកក្នុងវិស័យបវរកញ្ញាលើកដំបូងក្នុងកម្មវិធី Miss Universe Cambodia 2025 មក កញ្ញាកំពុងឆក់បានការចាប់អារម្មណ៍តាមដានគាំទ្រកាន់តែខ្លាំងពីបណ្ដាអ្នកគាំទ្រលើបណ្ដាញសង្គម។
ក្នុងដំណើរនៃការឈានចូលវិស័យបវរកញ្ញានេះដែរ កន្លងមក តារាស្រី ហ្វីយ៉ាតា ក៏ទទួលបានការជំរុញលើកទឹកចិត្តខ្លាំងពីអ្នកគាំទ្រជាច្រើន ដែលមើលឃើញពីសមត្ថភាពរបស់នាង ទាំងរូបសម្រស់ ទេពកោលសល្យ និង ចំណេះដឹង ស័ក្តិសមជាបវរកញ្ញាតំណាងកម្ពុជាក្នុងកម្មវិធីណាមួយប្រកួតលើឆាកអន្តរជាតិទៀតផង។
យ៉ាងណាមិញ បន្ទាប់ពីក្លាយជាបេក្ខភាពកម្មវិធី Miss Universe Cambodia ក្នុងឆ្នាំ ២០២៥ ខណៈប៉ះសុទ្ធសឹងតែបេក្ខភាពជើងខ្លាំងមានបទពិសោធច្រើនលើវិស័យបវរកញ្ញា ឃើញថាតារាស្រីរូបនេះ កាន់តែត្រៀមខ្លួនដោយភាពជឿជាក់ មោះមុត ខំហ្វឹកហាត់ពង្រឹងសមត្ថភាពបន្ថែម និង ស្វែងយល់នូវបទពិសោធថ្មីៗមិនឱ្យចាញ់បេក្ខភាពដទៃឡើយ។
លើសពីនេះ ក្រោយពីឆ្លងកាត់ការប្រកួតប៉ុន្មានវគ្គនៃកម្មវិធី MUC 2025 កន្លងទៅនេះ អ្នកនាង ហ្វីយ៉ាតា កាន់តែឆក់បានការគាំទ្រពេញចិត្ត និង សរសើរខ្លាំងពីមហាជន ក៏ដូចជាគណៈកម្មការក្នុងកម្មវិធី លើភាពលេចធ្លោរបស់នាងពីមួយវគ្គទៅមួយវគ្គ ទាំងការដើរ ចំណេះដឹង ទាំងការរៀបចំខ្លួនបានរៀបរោយ និង សមត្ថភាពផ្សេងៗបង្ហាញចេញមកដោយគុណភាព ដែលមានមតិជាច្រើនថានាងនឹងអាចដណ្ដើមបានឱកាសឈរលើឆាកអន្តរជាតិផងដែរ៕
