ទស្សនិកជនសឹងតែគ្រប់ស្រទាប់ហើយ មិនថាចាស់ ឬក្មេង ប្រុសស្រី ភាគច្រើនសុទ្ធតែបានស្គាល់ពីភាពល្បីល្បាញរបស់តារាចម្រៀងស្រីសំឡេងស្រួយស្រែសកញ្ញា សុខ ពិសី ដោយ កញ្ញា ត្រូវបានគេចាត់ទុកជាសិល្បការិនីមួយរូប អាចឈរជើងនៅក្នុងវិស័យសិល្បៈចម្រៀងច្រើនឆ្នាំ តែមិនថមថយប្រជាប្រិយភាពទាល់តែសោះ។
តារាចម្រៀងស្រីគ្រាប់ពេជ្រប្រចាំផលិតកម្មសាន់ដេរូបនេះ បានរក្សាប្រជាប្រិយភាពរបស់ខ្លួនតាំងពីជំនាន់ចេញបទចម្រៀងដំបូងៗនៅខ្ទង់ឆ្នាំជាង ២០០០ រហូតមកដល់បច្ចុប្បន្ន សុខ ពិសី នៅតែយកបានបេះដូងអ្នកគាំទ្រ តាមរយៈទឹកដមសំឡេងដ៏ផ្អែមពីរោះ អត្តចរិតរួសរាយរាក់ទាក់ ថ្លៃថ្នូររបស់នាង ជាពិសេសដ្បិតថាពេលនេះ សុខ ពិសី មានវ័យ ៣០ ប្លាយក៏ពិតមែន តែនាងកាន់តែស្រស់សោភា សាច់សខ្ចីភ្លឺរលោងគួរឱ្យចង់គយគន់មិនជិនណាយ។
បើនិយាយពីវិស័យចម្រៀងវិញ ទោះបីជាបច្ចុប្បន្នមានសិល្បករ-ការិនីស្រករក្រោយៗវាយលុកទីផ្សារសិល្បៈយ៉ាងណាក្ដី ក៏កញ្ញា សុខ ពិសី នៅតែបង្ហាញវត្តមានលើឆាកប្រគំតន្រ្តីធំៗ ព្រមទាំងមានវត្តមានច្រៀងនៅ Pub នានាហូរហែជាប់គ្នារដឹក ដែលទាំងអស់នេះបានបង្ហាញឱ្យឃើញថា សុខ ពិសី នៅតែជាតារាស្រីរៀមច្បងដ៏មានលទ្ធិពលឈរជើងលើវិថីមួយនេះចាស់វស្សាមួយរូប៕
