តារាចម្រៀងស្រីថ្ពាល់ប៉ោងរាងតូចច្រឡឹង អែនជែលឡា បានសម្រេចចិត្តរៀបការសាងគ្រួសារជាមួយស្វាមីឈ្មោះ ហេង ឧត្តមវិទូ កាលពីថ្ងៃទី ២៧ ឧសភា ឆ្នាំ ២០២៤ កន្លងទៅ ដោយកាលនោះគេចាំបានថា ពិធីមង្គលរបស់តារាស្រីរូបនេះ និង ស្វាមី បានប្រារព្ធឡើងយ៉ាងស្ងប់ស្ងាត់ ពោលគឺមានតែគ្រួសារសាច់ញាតិទាំងសងខាង និង មិត្តជិតដិតចូលរួមប៉ុណ្ណោះ។
ងាកត្រលប់ថតក្រោយបន្តិច ដូចអ្នកគាំទ្រជាច្រើនបានជ្រាបហើយថា អែនជែលឡា បានបាត់មុខពីវិស័យសិល្បៈចម្រៀងរាប់ឆ្នាំ ទើបតែនៅប៉ុន្មានឆ្នាំចុងក្រោយនេះប៉ុណ្ណោះដែលតារាស្រីរូបនេះ លេចមុខត្រឡប់មកចាប់អាជីពចម្រៀងឡើងវិញ ប៉ុន្ដែទោះជាបែបនេះ អែនជែលឡា នៅតែរក្សាជីវិតឯកជនមិនសូវចូលចិត្តបង្ហាញរឿងរ៉ាវផ្ទាល់ខ្លួនលើបណ្ដាញសង្គមឡើយ ជាពិសេសគឺរឿងពាក់ព័ន្ធនឹងជីវិតស្នេហា។
ជាក់ស្ដែងដ្បិតថាមកដល់ពេលនេះ ម្ចាស់បទ «បង្ខំចិត្តបែក» រូបនេះ បានរៀបការសាងគ្រួសាររួចរាល់ជាង ១ ឆ្នាំហើយក្ដី តែនាងកម្របង្ហាញពីជីវិតឯកជនដ៏ផ្អែមល្ហែមនៅលើបណ្ដាញសង្គមដូចសិល្បករដទៃទៀតណាស់។ ដោយឡែកចំពោះការងារសិល្បៈ អែនជែលឡា នៅតែលេចមុខច្រៀងតាមឆាកតន្រ្តី ឬ Pub នានា ហើយក៏បង្ហោះវីដេអូច្រៀងនៅលើហ្វេសប៊ុកផេកផ្ទាល់ខ្លួនធម្មតា៕
