នៅថ្ងៃទី ២៣ ខែតុលា ឆ្នាំ ២០២៥ នេះ ឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិកម្ពុជា និង ជាសហប្រធានគណៈកម្មាធិការព្រំដែនទូទៅ (GBC) បានប្រកាសស្វាគមន៍ចំពោះកិច្ចព្រមព្រៀងសន្តិភាព ដែលគ្រោងចុះហត្ថលេខានៅប្រទេសម៉ាឡេស៊ី នាថ្ងៃទី ២៦ ខែតុលា ឆ្នាំ ២០២៥ ខាងមុខនេះ ដោយនាយករដ្ឋមន្រ្តីប្រទេសទាំងពីរ ខណៈសភាពការណ៍នេះ ក៏បង្កលក្ខណៈចំពោះការដោះលែងទាហានកម្ពុជា ១៨ នាក់ ក្រោមកិច្ចព្រមព្រៀងសន្តិភាពនេះ។
យ៉ាងណាមិញ គិតត្រឹមថ្ងៃទី ២៤ ខែតុលា ឆ្នាំ ២០២៥ នេះ បើទោះជាមិនទាន់បានដោះលែងទាហានកម្ពុជា ១៨ នាក់ ក៏ពិតមែន កន្លងមកទាហានទាំង ១៨ នាក់ ក៏បានសរសេរសំបុត្រផ្ញើមកកាន់ក្រុមគ្រួសារ ដែលរស់នៅឯប្រទេសកម្ពុជាតាមរយៈកាកបាទក្រហមផងដែរ។
ជាក់ស្តែង ក្រឡេកទៅមើលគណនី Tik Tok មួយឈ្មោះ Vicheka ដែលត្រូវជាភរិយារបស់នាយទាហានឈ្មោះ ក្រៀល ចន្ទ្រា ដែលត្រូវបានទាហានថៃចាប់ខ្លួននោះ បានបង្ហោះឱ្យដឹងថា ខ្លួន និង ក្រុមគ្រួសារបានសរសេរសំបុត្រទី ៣ ផ្ញើទៅស្វាមីហើយ សង្ឃឹមថានឹងមានដំណឹងល្អនាសប្តាហ៍ក្រោយ។
ក្នុងនោះ តាមរយៈសំណេររបស់ភរិយានាយទាហាន ក្រៀល ចន្ទ្រា បានសរសេរភ្ជាប់នឹងវីដេអូលើ Tik Tok ថា ៖ «សង្ឃឹមថាសប្តាហ៍ក្រោយ នឹងមានរឿងល្អសម្រាប់គ្រួសារខ្ញុំ និង បងប្អូន សូមតាមដានទាំងអស់គ្នា»៕
