តារាចម្រៀង K-pop ដ៏ល្បី G-Dragon បានពង្រីកវិសាលភាពកាន់តែខ្លាំងទៅក្នុងចក្រវាលច្នៃប្រឌិត ដោយបានសហការជាមួយក្រុមហ៊ុនផលិតនាឡិកាម៉ាក Jacob & Co ដើម្បីបញ្ចេញម៉ូដខ្សែកដ៏ពិសេស និង ចំនួនមានកំណត់ ដែលឱ្យឈ្មោះថា Jacob & Co x Peaceminusone Pendant។
ខ្សែកនេះត្រូវបានបំផុសគំនិតផ្ទាល់ពីតារាចម្រៀង G-Dragon ក្រោមទស្សនវិជ្ជា«សន្តិភាពដកមួយ» ឬ “peace minus one” ដែលសង្កត់ធ្ងន់លើភាពច្នៃប្រឌិត និង ការបញ្ចេញភាពជាខ្លួនឯង។ ជាក់ស្តែង តារារូបនេះបានឌីហ្សាញចេញជាម៉ូដផ្កាដេស៊ី ដែលជាអត្តសញ្ញាណសំខាន់របស់ខ្លួន ហើយម៉ូដផ្កានេះដែរ រចនាជាបែបបាត់មួយត្របក។
ខ្សែកនេះធ្វើឡើងពីរជម្រើស។ មួយធ្វើឡើងពីប្រាក់ជាមួយត្បូងកណ្តៀងពណ៌លឿង និង ត្បូង tsavorites បៃតង ដែលដាក់លក់តម្លៃ ១៧០០ ដុល្លារ។ ចំណែកមួយទៀត ធ្វើឡើងពីមាសស 18K ជាមួយត្បូងពេជ្រសដាំជុំ លាយត្បូងពេជ្រពណ៌លឿងចំកណ្តាល និង ត្បូង tsavorites បៃតង ដែលមានតម្លៃ ១៥ ៦០០ ដុល្លារ។
ខ្សែកដ៏ពិសេសនេះ G-Dragon ផ្តោតពាក់បានទាំងបុរស និង នារី។ លោកបាននិយាយដែរថា៖ «បំណងប្រាថ្នារបស់ខ្ញុំសម្រាប់អ្នកគាំទ្រ គឺមិនប្រកាន់ប្រុសឬស្រីទេ ខ្ញុំគ្រាន់តែចង់បានមនុស្សច្រើនពាក់គ្រឿងអលង្ការបស់ខ្ញុំ»៕
ប្រភព៖ CNA
