នៅថ្ងៃទី ១២ ខែមករា ឆ្នាំ ២០២៥ ខាងមុខនេះ ពិធីបុណ្យសព ៧ ថ្ងៃ របស់តារាចម្រៀងរ៉េបល្បីឈ្មោះ RtuhKo នឹងរៀបចំឡើងតាមប្រពៃណីហើយ ក្រោយពីលោកបានជួបគ្រោះថ្នាក់ចរាចរណ៍បាត់បង់ជីវិតនៅវេលាម៉ោង ១ និង ៤០ នាទី រំលងអធ្រាត្រឈានចូលថ្ងៃទី ០៦ ខែមករា ឆ្នាំ ២០២៥ កន្លងទៅ។
ក្នុងនោះ ការបាត់បង់សិល្បករក្នុងវិស័យចម្រៀងរ៉េប RuthKo បានធ្វើឱ្យក្រុមគ្រួសារ មិត្តភក្តិ និង មហាជនអ្នកគាំទ្រនៅមិនទាន់ទទួលយកបាននៅឡើយទេ ក៏ព្រោះតែលោក គឺជាធនធានមនុស្សដ៏ល្អពោរពេញដោយសមត្ថភាពមួយរូបក្នុងសង្គម និង វិស័យសិល្បៈ។
ដោយឡែក បើនិយាយពីកម្មវិធី Rapper Fighter ដែលមានលោក RuthKo ជា Coach មួយរូបកាលនៅមានជីវិតឯណោះវិញ កាន់តែស្រណោះស្រណោក ក៏ព្រោះកម្មវិធីមិនទាន់ចប់នៅឡើយផង Coach រូបនេះ បានលាចាកលោកចោលក្រុមការងារ និង កូនក្រុម ខណៈកម្មវិធីប្រឡងមិនទាន់ចប់នៅឡើយ។
ជាក់ស្តែង ថ្មីៗនេះបើតាមការបង្ហោះវីដេអូចែករំលែកជាបន្តបន្ទាប់របស់កញ្ញា ហ្វាហ្វា ជាពិធីការិនីក្នុងកម្មវិធី Rapper Fighter បានបង្ហាញឈុតក្រៅឆាកពីការថត ដោយមានការកាន់ទុក្ខដល់លោក RuthKo ទៀតផង។ ជាងនេះទៅទៀត អ្វីដែលក្តុកក្តួល គឺកៅអីដែល Coach RuthKo ធ្លាប់អង្គុយ លែងមានម្ចាស់ចាប់ពីពេលនេះទៅហើយ៕
