មហាជនអ្នកប្រើប្រាស់បណ្ដាញសង្គម បាន និង កំពុងនាំគ្នាចូលរួមរំលែកទុក្ខសម្ដែងក្ដីសោកស្ដាយ បន្ទាប់ពីទទួលបានដំណឹងនារីមួយរូបឈ្មោះ ឡុង ចរិយា បានបាត់បង់ជីវិតក្នុងអាយុ ២៧ ឆ្នាំ ឱនកក់សក់បណ្តាលឱ្យដាច់សរសៃឈាមខួរក្បាល នៅថ្ងៃទី ២៣ ខែកុម្ភៈ ឆ្នាំ ២០២៥ វេលាម៉ោង ២ រសៀល។ នេះបើតាមការឱ្យដឹងពីគណនីឈ្មោះ Ou Savet។
បើតាមរយៈគណនីប្អូនបង្កើតនៃគ្រួសារសព នៅថ្ងៃទី ២៤ ខែកុម្ភៈ ឆ្នាំ ២០២៥ នេះ ក៏បានជូនដំណឹងឱ្យបានដឹងដែរថា ខ្លួនមានឈ្មោះ ឡុង ច័ន្ទតារា ត្រូវជាប្អូនបង្កើតនៃគ្រួសារសព ជូនដំណឹងទៅដល់ពុកម៉ែ ពូមីង អ៊ំប្រុសអ៊ំស្រី មិត្តភក្កិ បងប្អូនជិតឆ្ងាយទាំងអស់អំពីមរណទុក្ខ ដែលបងស្រីបង្កើតរបស់ខ្លួនឈ្មោះ ឡុង ចរិយា (Charya) បានទទួលមរណភាព នៅថ្ងៃទី ២៣ ខែកុម្ភៈ ឆ្នាំ ២០២៥ វេលាម៉ោង ២ រសៀល ដោយសារដាច់សរសៃឈាមខួរក្បាលធ្ងន់ធ្ងរ។
តាមប្រភពបានឱ្យដឹងទៀតថា បច្ចុប្បន្នសពតម្កល់នៅគេហដ្ឋាន ត្រៀមដង្ហែចេញទៅវត្តជម្ពូវ័ន ផ្លូវជាតិលេខ ៤ រាជធានីភ្នំពេញ នាម៉ោង ២ រសៀល និង បូជានៅម៉ោង ៦:០០ ល្ងាច ថ្ងៃទី ២៤ ខែកុម្ភៈ ឆ្នាំ ២០២៥ នេះ។
គួរឱ្យដឹងដែរថា បើតាមការរៀបរាប់របស់ម្ចាស់គណនីហ្វេសប៊ុកឈ្មោះ Ou Savet ក៏បានបង្ហាញពីមូលហេតុនៃការស្លាប់បាត់បងជីវិតរបស់នារីមួយរូបឈ្មោះ ឡុង ចរិយា ដែរថា គឺដោយសារតែការមកពីហត់ និង ក្តៅ ហើយមកដល់ផ្ទះងូតទឹកឱនក្បាលកក់សក់ ទើបបណ្តាលឱ្យដាច់សរសៃឈាមខួរក្បាលតែម្តង៕
