អ្នកនាំពាក្យក្រសួងបរិស្ថាន ប្រាប់កុំឱ្យពលរដ្ឋព្រួយបារម្ភ ខណៈជាតិពុលក្នុងខ្យល់នៅកម្ពុជា មិនទាន់ឈានដល់កម្រិតប្រកាសអាសន្នទេ

នៅថ្ងៃទី ២៣ ខែមករា ឆ្នាំ ២០២៥ នេះ ឯកឧត្ដម ខ្វៃ អាទិត្យា អនុរដ្ឋលេខាធិការ និង ជាអ្នកនាំពាក្យក្រសួងបរិស្ថាន បានបញ្ជាក់ឱ្យដឹងថា ការបំពុលខ្យល់នៅក្នុងប្រទេសកម្ពុជា មិនទាន់កើនឡើងកម្រិតនៃការបង្កហានិភ័យធ្ងន់ធ្ងរដល់សុខភាពសាធារណៈនោះទេ ហើយសូមប្រជាពលរដ្ឋកុំមានការព្រួយបារម្ភ។

ឯកឧត្ដមបានបន្ដថា តាមទិន្នន័យដែលទទួលបានពីឧបករណ៍ និង ស្ថានីយតាមដានត្រួតពិនិត្យគុណភាពខ្យល់នៅក្នុងព្រះរាជាណាចក្រកម្ពុជា បានបង្ហាញអំពីការធ្លាក់ចុះគុណភាពខ្យល់គួរឱ្យកត់សម្គាល់នៅអំឡុងពេលប៉ុន្មានថ្ងៃនេះ ជាពិសេសការកើនឡើងកំហាប់ភាគល្អិតនិចលដែលមានវិជ្ឈមានតូចជាងឬស្មើ ២,៥ មីក្រូម៉ែត្រ (PM2.5) នៅក្នុងបរិយាកាស។ ទាក់ទងនឹងការធ្លាក់ចុះនេះដែរ ឯកឧត្ដមអ្នកនាំពាក្យបានពន្យល់ថា ដ្បិតកំហាប់ភាគល្អិតនៃការបំពុលខ្យល់នៅកម្ពុជាបានកើនឡើងដល់កម្រិតជាង ៣០ មីក្រូក្រាម ក្នុងមួយម៉ែត្រគូបក្តី ប៉ុន្តែកម្រិតនេះមិនបង្កឱ្យមានផលប៉ះពាល់ដល់សុខភាពសាធារណៈឡើយ។

ឯកឧត្តមបានសង្កត់ធ្ងន់ថា កម្រិតនេះស្ថិតនៅក្រោមបន្ទាត់ក្រហមនៃការប្រកាសអាសន្ន ហើយក្នុងករណីនៅបន្ដកើនឡើងក្រសួងបរិស្ថាន នឹងចេញជូនដំណឹងដល់ប្រជាពលរដ្ឋជាបន្ដបន្ទាប់ ខណៈក្រសួងបានបញ្ចេញរថយន្ដចល័តដើម្បីពិនិត្យគុណភាពខ្យល់ ដែលមានទីតាំងចំនួន ៦០ កន្លែង នៅទូទាំងប្រទេស ហើយនៅរាជធានីភ្នំពេញមាន ១០ ទីតាំងផងដែរ។

ក្នុងនោះ ឯកឧត្តម ខ្វៃ អាទិត្យា ក៏បានបញ្ជាក់បន្ថែមថា ការធ្លាក់ចុះគុណភាពខ្យល់នេះ មានប្រភពមកពីការបញ្ចេញផ្សែងពីយានយន្ត រោងចក្រ ឧស្សាហកម្ម ការដុតសំណល់កសិកម្ម គល់ជញ្ជ្រាំង ភ្លើងឆេះព្រៃ ការដុតសំរាម សំណល់រឹងនៅតាមលំនៅឋាន និង ប្រភពផ្សេងៗទៀត រួមផ្សំនឹងកត្តាប្រែប្រួលធាតុអាកាស៕

ប្រភព ៖ ក្រសួងព័ត៌មាន