ថ្មីៗនេះ នៅប្រទេសអង់គ្លេសមានរឿងរ៉ាវដ៏គួរឱ្យហួសចិត្តមួយ ដែលមានប្តីប្រពន្ធមួយគូ ត្រូវចោរលួចឡានបាត់ តែបាននាំគ្នាស៊ើប និង ចូលទៅលួចឡានពីចោរវិញទាល់តែបាន ព្រោះចាំប៉ូលិសជួយរកឱ្យយូរពេក។
ប្តីប្រពន្ធខាងលើនេះមានឈ្មោះថា Mia Forbes Pirie និង Mark Simpson តាមព័ត៌មានបានឱ្យដឹងថាពួកគេបានបាត់ឡានមួយគ្រឿងម៉ាក Jaguar E-Pace កាលពីថ្ងៃទី ៤ ខែមិថុនា ឆ្នាំ ២០២៥ កន្លងទៅ នៅផ្ទះនា Brook Green ទីក្រុង London។ ក្នុងនោះ ឡាននេះមាន AirTag ដែលជាឧបករណ៍តាមដានទីតាំងលាក់នៅខាងក្នុងរថយន្ត ទាំងគូក៏តាមដានដឹងពីទីតាំងដែលចោរយកឡានទៅ រួចក៏បានប្តឹងប៉ូលិស តែខាងប៉ូលិសបានប្រាប់ថាពួកគេរវល់ណាស់ មិនដឹងថាពេលណាអាចជួយរកឱ្យបាននោះទេ។
យ៉ាងណាមិញ ដោយសារតែពឹងប៉ូលិសមិនបាន ប្តីប្រពន្ធទាំងគូក៏បានសម្រេចចិត្តទៅរកទីតាំងដែលចោរយកឡានទៅ ក៏ឃើញឡានចតចោលនៅផ្លូវស្ងាត់មួយ ហើយត្រូវចោរកាច់សោរ និង ព្យាយាមបំផ្លាញប្រព័ន្ធការពារឡាន។ ចុងក្រោយ ប្តីប្រពន្ធទាំងគូក៏យកឡានរបស់ខ្លួនមកវិញបានសម្រេច ក្រោមការសរសើរពីមហាជននៅតាមបណ្តាញសង្គម៕
ប្រភព៖ Khaosod
