ពិតណាស់ ស្របពេលផ្ទុះវែកញែកជុំវិញរឿងរ៉ាវពាក់ព័ន្ធជំនឿ និង ភាពរកាំរកូសរវាងប្ដីប្រពន្ធរបស់កំពូលតារាចម្រៀងស្រី មាស សុខសោភា ប៉ុន្មានថ្ងៃនេះ ឃើញថាមហាជនអ្នកគាំទ្រលើបណ្ដាញសង្គមជាច្រើនបានបន្តការចែករំលែក និង បញ្ចេញមតិយោបល់លើកឡើងរៀងៗខ្លួន។
ក្នុងនោះ ក៏បានឃើញមិត្តអ្នកសិល្បៈជាច្រើនរូប ដែលសុទ្ធសឹងតែជាមិត្តសម្លាញ់ ក៏ដូចជាអ្នកគោរពស្រឡាញ់កំពូលតារាចម្រៀងស្រី មាស សុខសោភា បានធ្វើការបង្ហោះសារលើហ្វេសប៊ុករៀងៗខ្លួន ដោយបង្ហាញការលើកទឹកចិត្ត និង ជូនពរយ៉ាងមានន័យចំពោះអ្នកនាង ព្រមទាំងបង្ហាញក្ដីស្រឡាញ់ដ៏ធំធេងក្នុងនាមមិត្តនៅជួយផ្ដល់កម្លាំង និង ជម្នះរឿងរ៉ាវអាក្រក់ៗផងដែរ។
ដោយឡែក ក្រឡេកទៅមើល លោក មាស សុខរតនៈ បងប្រុសបង្កើតរបស់អ្នកនាង មាស សុខសោភា ឯណោះវិញ ក្រោយពីមានការបញ្ចេញមតិវែកញែកជាបន្តបន្ទាប់លើប្អូនស្រី ស្រាប់តែរូបលោកបានឆ្លើយតបទៅកាន់ខមមិនមួយពីអារម្មណ៍របស់លោកថា៖ «ក្តីសុខរបស់មនុស្សម្នាក់ៗ មិនអាចកំណត់ដោយភ្នែករបស់យើងបាននោះទេអូនអើយ យើងមើលមិនឃើញថាវាមិនត្រូវ មិនល្អ មិនសម តែពេលនេះគ្នាកំពុងតែមានក្តីសុខក្នុងរូបភាពបែបនេះ ចឹងយើងត្រូវតែទទួលវាសិន ប្រសើរជាងបាត់បង់ប្អូនយើងដោយគ្មានថ្ងៃត្រឡប់។ បងសុខចិត្តមើលថែប្អូនឆ្កួតទៅថ្ងៃមុខ ប្រសើរជាងបង បានត្រឹមតែឈរមើលរូបថតប្អូនបង។ នេះជាអារម្មណ៍ពិតរបស់បង»។
លើសពីនោះ លោក មាស សុខរតនៈ ក៏បានសរសេរសារមួយបន្ថែមទៀតថា៖ «បើបងប្អូនជាខ្ញុំនោះ បងប្អូននឹងដឹងថាខ្ញុំឈឺចាប់កម្រិតណាជាក់ជាមិនខាននៅក្នុងដំណាក់កាលនេះ»៕
