នាពេលថ្មីៗនេះ មហាជនអ្នកប្រើប្រាស់បណ្ដាញសង្គម បាននាំគ្នាផ្ទុះការចាប់អារម្មណ៍ និង ចែករំលែកបន្តគ្នា នូវឃ្លាថា ៖ «ហូបស្ពឺអត់?» ដែលជាឃ្លាកំពុងពេញនិយម ពិសេសត្រូវបានយុវវ័យប្រើប្រាស់ក្នុងន័យកម្សាន្ត និង ផ្ដោះផ្ដងក្នុងន័យរម្យទមគួរឱ្យចាប់អារម្មណ៍។
យ៉ាងណាមិញ ឃ្លា «ហូបស្ពឺអត់?» នេះផងដែរ គឺជាឃ្លាដែលបានដកស្រង់ចេញពីសៀវភៅ «ពេជ ចន្ទមុន្នី ភរិយានាយករដ្ឋមន្ត្រីទី៣៧ នៃកម្ពុជា» នៅទំព័រទី ៧៣ ដែលបង្ហាញពីគ្រាផ្ដើមស្នេហ៍មួយ នៃនាយករដ្ឋមន្ត្រីបច្ចុប្បន្នរបស់កម្ពុជា គឺសម្ដេចមហាបវរធិបតី ហ៊ុន ម៉ាណែត និង លោកជំទាវ ពេជ ចន្ទមុន្នី ដែលមានអត្ថន័យពេញលេញដូចតទៅ ៖
«នៅថ្ងៃមួយ ខ្លួន និង មិត្តភក្តិបានទៅផ្ទះលោកគ្រូ ចេង យា ជាគ្រូគណិតវិទ្យា ដែលផ្ទះគាត់មានទីតាំងនៅក្នុងសាលាដែរ ហើយនៅទីនោះមានដើមស្ដឺមួយដើម។ លោកគ្រូ ចេង យា បង្រៀនគណិតវិទ្យា បន្ថែមទាំងថ្នាក់សិស្សច្បង និង ថ្នាក់សិស្សប្អូន គឺបង្រៀនម៉ោងខុសគ្នា គឺ ម៉ោងមុន និង ម៉ោងក្រោយ ប៉ុន្តែថ្ងៃមួយនោះ គាត់មិនបានបង្រៀនទេ ដែលធ្វើឱ្យសិស្សទាំងថ្នាក់ម៉ោងមុនក៏ចាំ ម៉ោងក្រោយក៏ចាំ។ ខណៈ ចន្ទ មុន្នី កំពុងអង្គុយលើបង់ (កៅអីថ្ម) នៅក្រោមដើមស្ដឺនោះ ក៏ស្រាប់តែ មានស្បែកជើងម្ខាងធ្លាក់ពីលើដើមស្តឺចំលើខ្លួន។ នៅពេលងើយមើលលើទើប ចន្ទមុន្នី បានឃើញ ម៉ាណែត កំពុងបេះផ្លែស្ពឺ ហើយខឹង និង នឹកក្នុងចិត្តថា «ពូនេះទៀតហើយ! រឿងចាប់ព្រីយ៉ុងមិនទាន់ភ្លេចផង ឥឡូវ ពូនេះទៀត!»។ ដើម្បីជាការសូមទោសផង ម៉ាណែត ចុះមក ហើយហុចផ្លែស្តីមួយឱ្យ ចន្ទមុន្នី ហើយនិយាយថា «ហូបស្ពឺអត់»។
ជាបន្តបន្ទាប់ តាមរយៈការប្រជុំពិភាក្សា និង ចែករំលែកចំណេះដឹង រួមទាំងបទពិសោធផង នៅក្នុងក្លឹបសិស្សពូកែគណិតវិទ្យាផង និង នៅក្នុងការងារសម្ព័ន្ធយុវជនសាលាផង អ្នកទាំងពីរក៏បានក្លាយជាមិត្តផង និង ក្នុងនាមជាសិស្សច្បងសិស្សប្អូនផង ដោយ ចន្ទមុន្នី បានរម្លឹកប្រាប់ខ្ញុំ (អ្នកចងក្រងសៀវភៅ) និងសហការីថា ខ្លួនមិនមានស្នេហាទេ ហើយក៏មិនបានដឹងថា ម៉ាណែត លួចស្រឡាញ់ខ្លួននៅពេលណាដែរ ព្រោះខ្លួននៅក្មេង គ្រាន់តែដឹងថាជាមិត្តធម្មតាប៉ុណ្ណោះ។ ដោយសារតែ ចន្ទមុន្នី ដែលពេលនោះមានអាយុទើប ១៤ ឆ្នាំ មានចរិយាទន់ភ្លន់ សុភាព រាបសា សាមញ្ញ និង មិនសូវនិយាយច្រើន ម៉ាណែត ក៏ចាប់ផ្តើមចាប់ចិត្ត ប្រតិព័ទ្ធ»។
សូមបញ្ជាក់ផងដែរថា ឃ្លាខាងលើនេះ គឺត្រូវបានដកស្រង់ចេញពីសៀវភៅ «ពេជ ចន្ទមុន្នី ភរិយានាយករដ្ឋមន្ត្រីទី៣៧ នៃកម្ពុជា» ចងក្រងដោយឯកឧត្តមបណ្ឌិត ឆាយ សុផល រដ្ឋលេខាធិការក្រសួងព័ត៌មាន ជាអ្នកនិពន្ធសៀវភៅ និង ជាគ្រូឧទ្ទេសផ្នែកសារព័ត៌មាន និង ទំនាក់ទំនងសាធារណៈ ដែលបច្ចុប្បន្ន ឯកឧត្តមបណ្ឌិតបានចងក្រងស្នាដៃសៀវភៅសរុបជាង ២០ ក្បាល បូករួមស្នាដៃជួយសរសេរ និង កែសម្រួលជាច្រើនទៀតផងដែរ៕
