សម្រាប់អាជីពដើរបង្ហាញម៉ូដ សព្វមួយដង រ៉េននី ដារ៉ា ធ្លាប់តែដើរឱ្យម៉ាកមួយចំនួននៅក្នុងស្រុក ឥលូវនេះបើកទំព័រឆ្នាំថ្មីភ្លាម លោកទទួលបានឱកាសធំ ដោយត្រូវបានអញ្ជើញទៅបង្ហាញម៉ូដឱ្យម៉ាកសម្លៀកបំពាក់ដ៏ល្បីមួយនៅប្រទេសវៀតណាម។ នេះគឺជាលើកទីមួយហើយសម្រាប់លោក ដែលដើរបង្ហាញម៉ូដនៅក្រៅប្រទេស ហើយក៏ជាចំណែកមួយធ្វើឱ្យកម្ពុជាមានវត្តមានលេចធ្លោផងដែរ។
តាមការបង្ហោះនៅលើទំព័រហ្វេសប៊ុករបស់ រ៉េននី ដារ៉ា កម្មវិធីដែលលោកដើរបង្ហាញម៉ូដមានឈ្មោះថា Highway Fashion 1 ដែលធ្វើឡើងកាលពីថ្ងៃទី ០៤ ខែ មករា ឆ្នាំ ២០២៥។ កម្មវិធីនេះជាការបង្ហាញខូឡិកហ្សិនថ្មីរបស់ម៉ាក My K.D.V ជាម៉ាកសម្លៀកបំពាក់បុរសដ៏មានប្រជាប្រិយភាពមួយនៅប្រទេសវៀតណាម។ ក្នុងឈុតពណ៌លឿងខ្ចី លោកមើលមកពិតជាអេឡេហ្គង់ លេចធ្លោ ស្រស់សង្ហាមិនចាញ់តារាម៉ូឌែលដទៃឡើយ។
ជាមួយការបោះជំហានលើកដំបូង លោកបាននិយាយដែរថា លោកពិតជាសប្បាយចិត្តខ្លាំង ដោយសារនេះគឺជាឆាកទីមួយដែលលោកដើរបង្ហាញម៉ូដនៅប្រទេសវៀតណាម ហើយវាក៏ជាការសម្រេចបំណងប្រាថ្នាសម្រាប់ឆ្នាំ ២០២៥ ដែលដើរបង្ហាញម៉ូដជាមួយតារាល្បីៗនៅប្រទេសវៀតណាមផងដែរ។ លោកបន្ថែមទៀតថា ពេលប្រាប់គេថាលោកមកពីប្រទេសកម្ពុជា គ្រប់ៗគ្នាសុទ្ធតែទទួលស្វាគមន៍លោកជាខ្លាំង៕
