មហាជនអ្នកគាំទ្រលើបណ្ដាញសង្គម ជាពិសេសអ្នកគាំទ្រតាមដានរបស់ពិធីករល្បីឈ្មោះ តាប៊ុយ សុទ្ធសឹងតែបានជ្រាបហើយជុំវិញរ៉ាវកាលពីថ្មីៗកន្លងទៅ ដែលបានផ្ទុះការវែកញែកខ្លាំងទាក់ទងនឹងវីដេអូសម្ភាសមួយរបស់ពិធីកររូបនេះ ដោយក្នុងនោះលោកទទួលរងមតិរិះគន់មិនពេញចិត្តពីអ្នកលេងបណ្ដាញសង្គមចំពោះការធ្វើបទសម្ភាសនោះ។
ក្រៅពីមហាជនអ្នកលេងហ្វេសប៊ុក ក៏ឃើញមានអ្នកក្នុងចង្កោមសិល្បៈជាច្រើន ក៏ដូចជាបុគ្គលល្បីៗលើបណ្ដាញសង្គម បានចែករំលែក និង បញ្ចេញមតិវែកញែករៀងៗខ្លួនជុំវិញរឿងរ៉ាវនេះដែរ។
ដោយឡែក ស្របពេលរងការវែកញែកខ្លាំង ក៏ដូចជាមតិពីអ្នកក្នុងសិល្បៈ និង បុគ្គលល្បីៗលើបណ្ដាញសង្គមជាច្រើន ក៏បានឃើញពិធីករ តាប៊ុយ ចេញបង្ហោះសារមួយរៀបរាប់ជុំវិញរ៉ាវរបស់ខ្លួន ផ្ញើជូនជាពិសេសដល់មិត្តអ្នកសិល្បៈ ក៏ដូចអ្នកបង្កើតមាតិកាវីដេអូបណ្ដាញសង្គម ព្រមទាំងអ្នកគាំទ្ររបស់ខ្លួន ដោយលោកទទួលនូវពាក្យបញ្ចេញមតិទាំងអស់ ព្រោះជាសិទ្ធិរបស់បងប្អូនមហាជន តែរូបលោកនៅតែប្រកាន់ភ្ជាប់នៅចំណុចវិជ្ជមានចំពោះមនុស្សជុំវិញខ្លួន និង ការចង់ចាំល្អៗរបស់មិត្តអ្នកសិល្បៈ។ លើសពីនេះ តាប៊ុយ ក៏បានរៀបរាប់ពីដំណើរលើវិថីសិល្បៈរបស់លោកទាំងជោគជ័យ និង បរាជ័យ ព្រមទាំងបញ្ហាផ្លូវចិត្តដែលលោកបានជួបជាច្រើនកន្លងមកទៀតផង។
សារនោះ ពិធីករ តាប៊ុយ បានបង្ហោះរៀបរាប់ថា ៖ «សារនេះសូមជូនជាពិសេសជូនចំពោះ សិល្បករ សិល្បការិនី influencers content creator បណ្តាអ្នកគាំទ្រ ឬ មិនគាំទ្រដែលបានខមមិនទាក់ទងរឿងរ៉ាវថ្មីៗកន្លងមកអំពីខ្ញុំបាទ សម្រាប់អារម្មណ៍ខ្ញុំ គឺទុកសិទ្ធិឱ្យពុកម៉ែបងប្អូនខមមិនដោយសេរី ពីព្រោះជាសិទ្ធិរបស់គាត់ ពីព្រោះខ្ញុំបាទជាមនុស្សម្នាក់សម្លឹងមើលឃើញតែចំណុចល្អវិជ្ជមានរបស់មនុស្សជុំវិញខ្លួន ឬក្នុងបណ្តាញសង្គមពីព្រោះមនុស្សយើងម្នាក់ៗតែងតែមានចំណុចល្អក្នុងខ្លួន ហើយក៏នៅតែចងចាំអំពើល្អរបស់សិល្បករសិល្បការិនី influencers content creators ដែលធ្លាប់ចូលរួមធ្វើជាភ្ញៀវកិត្តិយសក្នុងកម្មវិធីពេញចិត្តឬអត់ ១ ដែលខ្ញុំបាទធ្លាប់ផលិតកន្លងមក ប្រសិនបើមិនមានវត្តមានគាត់កម្មវិធីក៏មិនជោគជ័យដូចដែលពុកម៉ែបងប្អូនបានដឹងនឹងទទួលស្គាល់ ពិសេសគឺអរគុណអស់ពីបេះដូង និង ទឹកចិត្តដល់ពុកម៉ែបងប្អូនដែលចំណាយពេលវេលាដ៏មានតម្លៃក្នុងការទស្សនាកម្មវីធីរបស់ខ្ញុំបាទ មិនមានការចូលរួមឬគាំទ្រចំណុចណាមួយរបស់អ្នកទាំងអស់គ្នា ខ្ញុំបាទក៏មិនមានថ្ងៃនេះដែរ»។
តាប៊ុយ បន្តថា ៖ «ពិសេសការផ្តល់ឱកាសការងារពី MyTV ដែលជាកន្លែងផ្លាស់ប្តូរឆាកជីវិតខ្ញុំ សម្រាប់អារម្មណ៍ខ្ញុំពេលនេះ គឺរឹងមាំទាំងរូបរាងសុខភាពផ្លូវកាយ ផ្លូវចិត្តបន្ទាប់ពីសម្រាកការគិតមួយរយៈគួរសម ពិសេសគឺខ្ញុំបាទបានជោគជ័យ ការគេងបន្ទាប់ពីបរាជ័យ ការគេងជាយូរជំនាន់ធ្វើការនៅ MyTV ពីព្រោះគិតច្រើនមិនចេះគ្រប់គ្រងអារម្មណ៍ខ្លួនឯង។
រាល់ថ្ងៃ គឺសប្បាយចិត្តប្រឹងតែងហាត់ប្រាណ ធ្វើការរកលុយហើយដើរនៅណាក៏ញញឹមពីព្រោះផ្លូវចិត្តកំពុងល្អ ពិសេសអាចជោគជ័យក្នុងការគេង ខុសឆ្គងត្រង់ចំណុចណា ខ្ញុំបាទសូមអភ័យទោសហើយក៏សង្ឃឹមថានឹងមានការបកប្រែសារនេះក្នុងន័យអវិជ្ជមានណាមួយ និង អរគុណយ៉ាងពិសេសនឹងចងចាំរឿងរ៉ាវល្អៗកន្លងមកដល់សិល្បករសិល្បការិនី influncers content creators បណ្តាអ្នកគាំទ្រនឹង CBS»៕
