ពេទ្យប៉ូលិសស្រីថៃផ្កាយពេញស្មាម្នាក់ ត្រូវចាប់ខ្លួនករណីបន្លំយកឈ្មោះអ្នកស្លា./ប់ ៣៧០ នាក់ទៅទិញថ្នាំសណ្តំ សង្ស័យពាក់ព័ន្ធការលាងលុយខុសច្បាប់

ថ្មីៗនេះ នៅក្នុងប្រទេសថៃ មានការចាប់ខ្លួនពេទ្យប៉ូលិសស្រីមួយរូប ក្នុងករណីបន្លំយកឈ្មោះអ្នកស្លាប់ទៅទិញថ្នាំសណ្តំក្នុងតម្លៃអស់រាប់លានបាត។

ពេទ្យប៉ូលិសរូបនេះមានឈ្មោះថា Anchulee Thirawongpaisan ឈ្មោះហៅក្រៅថា Air គេបានរកឃើញថាពេទ្យ បានទិញថ្នាំសណ្តំប្រភេទ Alprazolam តាំងពីក្នុងឆ្នាំ ២០២២ មកម្ល៉េះ ហើយបន្តទិញមកដល់ឆ្នាំ ២០២៥ នេះ ដោយមានលុយជាទុនរហូតដល់ទៅ ៤០០ លានបាត។ ខាងនាយកដ្ឋានចំណីអាហារ និងឱសថរបស់ថៃ បានរកឃើញថា ការបញ្ជាទិញគឺប្រើឈ្មោះអ្នកស្លាប់រហូតដល់ទៅ ៣៧០ នាក់ និង ប្រើឈ្មោះគ្លីនិកក្លែងក្លាយរហូតដល់ទៅ ១១ កន្លែង។ ក្នុងនោះ មានគ្រូពេទ្យចំនួន ៥ ទៅ ៦ នាក់ទៀតបានចូលរួម តែមានតែពេទ្យ Air តែម្នាក់ប៉ុណ្ណោះដែលជាអ្នកចេញលុយទិញ។

យ៉ាងណាមិញ ការិយាល័យប្រឆាំងគ្រឿងញៀន (NSB) បានចុះទៅឆែកឆេរផ្ទះ ក៏ដូចជាចាប់ខ្លួនពេទ្យ Air បានសម្រេច ហើយបញ្ជូនទៅសួរនាំតាមផ្លូវច្បាប់។ ដោយឡែក ករណីនេះត្រូវបានគេសង្ស័យថាអាចពាក់ព័ន្ធជាមួយនឹងការលាងលុយខុសច្បាប់ ហើយគេក៏មិនទាន់ដឹងថាពេទ្យ Air ទិញថ្នាំសណ្តំច្រើនយ៉ាងនេះទៅធ្វើអ្វីដែរ ប៉ុន្តែនៅប្រទេសថៃ ថ្នាំនេះត្រូវបានគេដឹងថាជាថ្នាំសណ្តំដែលជនខិលខូចប្រើក្នុងការប្រព្រឹត្តករណីបំពានផ្លូវភេទទៅលើនារីៗ៕

ប្រភព៖ Kapook