នៅព្រឹកថ្ងៃទី ១១ ខែមេសា ឆ្នាំ ២០២៥ នេះ តារាចម្រៀង មាស សុខសោភា បានធ្វើឱ្យមហាជនអ្នកលេងបណ្តាញសង្គមហ្វេសប៊ុកភ្ញាក់ផ្អើល រហូតផ្ទុះការវែកញែកជាខ្លាំង បន្ទាប់ពីឃើញនាងបានបង្ហោះសំណេរមួយរៀបរាប់ជុំវិញពីដំណើរនៃការយាងចុះរបស់ទេវតាឆ្នាំថ្មី ឆ្នាំម្សាញ់។
ក្នុងសំណេរយ៉ាងវែងអន្លាយនោះដែរ តារាចម្រៀង មាស សុខសោភា បានបង្ហាញពីការយាងចុះរបស់ទេវតាឆ្នាំថ្មី និង ឈ្មោះទេវតាឆ្នាំថ្មី ដែលតាមការពិនិត្យគឺមានភាពខុសគ្នាស្រឡះពីសៀវភៅមហាសង្ក្រាន្តខ្មែរ ឆ្នាំម្សាញ់ សប្តស័ក ដែលរៀបរៀងដោយឯកឧត្តម អ៊ឹម បុរិន្ទ អនុប្រធានអចិន្ត្រៃយ៍គណៈកម្មការស្រាវជ្រាវវិជ្ជាហោរាសាស្ត្រ និង ប្រពៃណីទំនៀមទម្លាប់ខ្មែរ។
នេះជាសំណេរដើមទាំងស្រុងរបស់តារាចម្រៀង មាស សុខសោភា ៖
«ទេវតាឆ្នាំម្សាញ់ ព្រះនាមកិមិរាទេវី ត្រូវយាងចុះមក ចំថ្ងៃសុក្រទី ១១ ត្រូវនឹងថ្ងៃ ១៤ កើត ខែចេត្រ ឆ្នាំម្សាញ់ ព.ស ២៥៦៨ ត្រូវនិង វេលាយាមម៉ោង ១៨:០១ នាទីព្រលប់ ដែលជាយាមសត្វពស់គ្រប់ប្រភេទចេញដើរ។ ទេវតាឆ្នាំម្សាញ់ ព្រះនាងទ្រង់គ្រឿងអាភរណៈ ពណ៌ខៀវ សៀកផ្ការំចង់ គ្រឿងតង្វាយ ផ្លែចេកណាំវ៉ា ព្រហស្ថស្តាំកាន់ព្រះខ័ន្ធ ព្រហស្ថឆ្វេងកាន់ពិណ្យ យានជំនិះមានស្ដេចគោទាំង ២១ ជាបរិវារ។
ចំណាំ ទេវតាស្រីព្រះនាម កិមិរាទេវី មិនមែនជាសត្វពស់វែកដែលមានពិសនោះទេ ព្រះនាងយាងចុះមក ដើម្បីបន្សាបពស់ពិសគ្រប់ប្រភេទនៅក្នុងឆ្នាំម្សាញ់នេះ មិនថាមនុស្សលោកណាដែលមានល្បិចពិសពុលអាក្រក់នោះ ក៏ត្រូវចុះចាញ់តេជ្ជៈរបស់ព្រះនាងដែរ ពីព្រោះព្រះនាងកិមិរាទេវី គឺជាអវតាផ្ទាល់របស់អាទិទេព ព្រះសិវៈ ដែលមានតួនាទីយកទឹកអម្រិត និង ព្រះខ័នចុះមកបន្សាបល្បិចពិសពុលអាក្រក់របស់ជនទាំងឡាយណាដែលគ្មានគុណធម៌ គំនិតទុច្ចរិត និង បន្សាបពស់មានពិសគ្រប់ប្រភេទ ដែលមាននៅលើផែនដីនេះ។
ម្យ៉ាងវិញទៀតត្រូវចងចាំថា គ្រប់តួអង្គទេវតាស្រីទាំង ៧ ដែលឈរកាន់តាមថ្ងៃសិរីទាំង ៧ គឺមានតួនាទី ចុះមកថែររក្សាផែនដី និង ថែរក្សាមនុស្សលោកគ្រប់រូប ហើយត្រូវយាងចុះមកគឺ ចំនៅថ្ងៃ ១៤ កើត និង ថ្ងៃ ១៤ រោចរៀងរាល់ឆ្នាំ មិនមែនចុះថ្ងៃទី ១៤ ជាថ្ងៃកំណត់ក្នុងការធ្វើពិធីនោះទេ! បុរាណកាលរបស់យើង លោកឱ្យកំណត់យកថ្ងៃ ១៤ កើត និង ១៤ រោច ដែលជាថ្ងៃសីលឋានរបស់ទេវតា មកធ្វើក្នុងពិធីទទួលទេវតាឆ្នាំថ្មីនីមួយៗរៀងរាល់ឆ្នាំ មិនមែននាំគ្នាច្រឡំបល់ឱ្យតែដល់ថ្ងៃទី ១៤ ខែមេសា កំណត់ជាថ្ងៃចូលឆ្នាំថ្មីនោះឡើយ។
ជាក់ស្ដែងដូចមនុស្សលោកយើងគ្រប់រូបគឺតែងតែគោរពយកថ្ងៃសីលឋានចំលើថ្ងៃ ១៤ កើត និង ១៤ រោច ជាថ្ងៃឧបោសថសីលដូច្នោះឯង ហើយក៏មិនមានទេវតាអង្គណា ចុះមកឋានកណ្តាល ខុសថ្ងៃសីលឋានរបស់ទេវតានោះឡើយ។
លោកទាំងឡាយក្បួនច្បាប់បុរាណកាលដែលជាជំនឿវប្បធម៌ដូនតារបស់យើង ត្រូវសាបរលាប និង បាត់បង់ជាយូរលង់ណាស់មកហើយ ដូច្នេះទូលបង្គំខ្ញុំករុណាចែករំលែកនេះ មិនមែនបង្ខំឱ្យលោកទាំងឡាយណាមកជឿលើខ្ញុំករុណាទេ ប៉ុន្តែត្រូវជរលើសច្ចធម៌ពិត បើតាមការសង្កេតមើល ប្រហែលជាមានតែខ្លួនយើងម្នាក់ឯងប៉ុណ្ណោះ ដែលគោរពទៅតាមក្បួនតម្រានៃ ជំនឿវប្បធម៌នេះ»។
យ៉ាងណាមិញ ក្រោយសរសេរបង្ហោះប្រមាណជា ៧ ម៉ោងរួចមក សំណេរខាងលើត្រូវបានតារាចម្រៀង មាស សុខសោភា លុបចេញវិញ តែទោះជាយ៉ាងនេះក្ដី ក៏គេនៅឃើញមានការចែករំលែក និង មានមហាជនជាច្រើនបានបញ្ចេញមតិវែកញែក និង ខ្លះថែមទាំងប្រតិកម្មជាមួយសំណេរនោះទៀតផង។ មិនត្រឹមតែប៉ុណ្ណោះ ចំពោះសំណេរខាងលើនេះ គេក៏បានកត់សម្គាល់ឃើញវត្តមានរបស់ ឯកឧត្តម អ៊ឹម បុរិន្ទ អនុប្រធានអចិន្ត្រៃយ៍គណៈកម្មការស្រាវជ្រាវវិជ្ជាហោរាសាស្ត្រ និង ប្រពៃណីទំនៀមទម្លាប់ខ្មែរ ក៏បានចូលទៅបញ្ចេញមតិទៀតផង៕
