នាពេលថ្មីៗនេះ មន្ទីរពេទ្យហ្លួងម៉ែ បានចេញសេចក្តីជូនដំណឹងស្តីពីការពិនិត្យ ស្វែងរកជំងឺមហារីកមាត់ស្បូន (Cervical Cancer Screening) ជូនដល់បងប្អូនប្រជាពលរដ្ឋងាយរងគ្រោះ ដោយឥតគិតថ្លៃ។
ក្នុងនោះ នៅថ្ងៃទី ០៥ ខែមីនា ឆ្នាំ ២០២៥ ខាងមន្ទីរពេទ្យបានបន្ថែមឱ្យដឹងថា បងប្អូនដែលចង់ពិនិត្យត្រូវមានលក្ខខណ្ឌចំនួន ៤ ទើបអាចធ្វើតេស្តស្វែងរកជំងឺមហារីកមាត់ស្បូនបាន ដែលមានដូចជា៖
១. មិនមានឈាមរដូវ
២. មិនត្រូវរួមភេទយ៉ាងតិច ៤៨ ម៉ោង
៣. មិនត្រូវសុលថ្នាំ ឬ លាងសម្អាតខាងក្នុងទ្វារមាសយ៉ាងតិច ៤៨ ម៉ោង
៤. មិនមានធ្លាក់ស ធ្ងន់ធ្ងរ (បើមានគួរប្រឹក្សាជាមួយវេជ្ជបណ្ឌិត ជំនាញដើម្បីទទួលការព្យាបាលជាមុនសិន)។
ចំពោះការពិនិត្យនេះផងដែរ មន្ទីរពេទ្យហ្លួងម៉ែ បានសហការជាមួយ អង្គការនគរទេព នឹងផ្ដល់ជូនការពិនិត្យស្វែងរកជំងឺមហារីក មាត់ស្បូន (Cervical Cancer Screening) ដោយឥតគិតថ្លៃ ដល់បងប្អូនប្រជាពលរដ្ឋងាយរងគ្រោះ ចាប់ពីអាយុ ២១ ឆ្នាំ ដល់ ៦៥ ឆ្នាំ (សម្រាប់អ្នកធ្លាប់មានដៃគូ)។ ដូច្នេះបងប្អូនអាចអញ្ជើញទៅចុះឈ្មោះមុននៅមន្ទីរពេទ្យហ្លួងម៉ែ ផ្លូវលេខ ១០៩ ភូមិព្រៃសខាងកើត សង្កាត់ព្រៃស ខណ្ឌដង្កោ រាជធានីភ្នំពេញ ចាប់ពីថ្ងៃទី ១ ខែមីនា ឆ្នាំ ២០២៥ តទៅ ចាប់ពីម៉ោង ៨:៣០-១១:៣០ (ចំនួនមានកំណត់)៕
