បើគិតមកដល់ពេលនេះ រយៈពេលប្រមាណជា ២០ ឆ្នាំមកហើយ ដែលអតីតតារាកំប្លែង ស្រីពៅ មុខឈើ បានផ្អាកអាជីពសិល្បៈ និង ក្រសោបយកអាជីពជាអ្នកផាត់មុខ ធ្វើសក់យ៉ាងជោគជ័យ ជូនដល់ភ្ញៀវលំដាប់ៗក្នុងប្រទេសកម្ពុជា និង បើកហាងលក់សម្លៀកបំពាក់។ យ៉ាងណាមិញ ថ្មីៗនេះ ស្រីពៅ មុខឈើ បានបង្ហាញវត្តមានក្នុងកម្មវិធី «ស-ខ្មៅ» របស់អ្នកនាង ពេជ្រ សេរីរ័ត្ន ដោយបានរៀបរាប់ពីរឿងរ៉ាវជីវិតតស៊ូក្នុងនាមជាភេទទី ៣ រងការរើសអើស និង ជីវិតក្នុងសិល្បៈថែមទៀតផង។
រៀបរាប់ពីខ្សែជីវិត ទម្រាំប្រសើរឡើងមកដល់សព្វថ្ងៃ ស្រីពៅ មុខឈើ ក៏បានលើកយករឿងរ៉ាវ ពេលចាប់ផ្តើមចូលវិថីសិល្បៈដំបូងៗ ដោយជំហានដំបូង ស្រីពៅ មុខឈើ បានសម្តែងជាមួយនឹង ស៊ីនឌី និង ត្រូវបាន នាយកុយ ហៅមកសម្តែងជាមួយបន្ត។ ជាងនេះទៅទៀត អ្វីដែលចាប់អារម្មណ៍ ស្រីពៅ មុខឈើបានបន្ថែមថា ក្រោយពីសម្តែងជាមួយ នាយកុយ ហើយ ក៏មានឱកាសចាប់បានភាពល្បីល្បាញខ្លាំងលើសិល្បៈ បន្ទាប់ពី នាយក្រឹម បានហៅទៅចូលក្រុមកំប្លែង។
ក្នុងនោះ ស្រីពៅ មុខឈើ បានលើកដៃដឹងគុណដល់ នាយក្រឹម និង លើកឡើងយ៉ាងភ្ញាក់ផ្អើលថា បើទោះជាពេលនេះរៀមច្បងខឹងស្អប់ខ្លួន ព្រោះការយល់ច្រឡំខ្លះក្តី ក៏ប៉ុន្តែខ្លួនមិនដែលភ្លេចអ្នកមានគុណម្តងណាដែរ។
ស្រីពៅ មុខឈើ រៀបរាប់ថា៖ «ខ្ញុំសូមអរគុណ សម្រាប់បង ក្រឹម តែងតែលើកខ្ញុំ ទោះពេលនេះគាត់ខឹង ឬ គាត់ស្អប់ខ្ញុំ ខ្ញុំនៅតែគោរពស្រឡាញ់គាត់ ព្រោះដោយសារការភាន់ច្រឡំបន្តិចបន្តួច ធ្វើឱ្យយើង ២ នាក់ អត់សូវនិយាយជាមួយគ្នា ប៉ុន្តែនៅតែប្រាប់ថាកូនក្រុមម្នាក់នេះនៅតែស្រឡាញ់គាត់អ៊ីចឹង ខ្ញុំមានកំណើត ខ្ញុំមានកេរ្តិ៍ឈ្មោះ ហើយបើគាត់អត់លើកខ្ញុំ ក៏អត់មានទស្សនិកជន អត់បានបងប្អូនស្គាល់ខ្ញុំដែរ អ៊ីចឹងអ្នកណាឱ្យបាយខ្ញុំញុំាមួយចាន ខ្ញុំនៅនឹកឃើញជានិច្ច ខ្ញុំអត់ដែលបំភ្លេចគុណអ្នកណាម្នាក់ ទោះអ្នកហ្នឹងមិនស្រឡាញ់ខ្ញុំ នៅតែស្អប់ខ្ញុំ ភាន់ច្រឡំនៅចំណុចណាមួយក៏ដោយ ខ្ញុំនៅតែគោរពគាត់ជានិច្ច»៕
សូមចុចទីនេះ ដើម្បីទស្សនាវីដេអូ៖
