នៅព្រឹកថ្ងៃទី ០៩ ខែកញ្ញា ឆ្នាំ ២០២៥ នេះ ជាថ្ងៃជាវេលាល្អក្នុងប្រវត្តិសាស្ត្រ ដែលអាកាសយានដ្ឋានអន្តរជាតិតេជោ បានចាប់ផ្តើមសម្ពោធបើកដំណើរការស្វាគមន៍ភ្ញៀវទេសចរជាតិ និងអន្តរជាតិជាផ្លូវការ ចាប់ពីថ្ងៃនេះតទៅ។
សូមបញ្ជាក់ថា ក្នុងថ្ងៃបើកសម្ពោធដំបូងនេះ មានក្រុមហ៊ុនអាកាសចរណ៍ចំនួន ២ គឺក្រុមហ៊ុន Air Cambodia និងក្រុមហ៊ុន Singapore Airlines នឹងធ្វើការចុះចតនៅអាកាសយានដ្ឋានអន្តរជាតិតេជោ នៅថ្ងៃទី ០៩ ខែកញ្ញា ឆ្នាំ ២០២៥ នេះ ដែលជាថ្ងៃសម្ពោធជើងហោះហើរដំបូង នឹងត្រូវធ្វើឡើងក្រោមអធិបតីភាព លោក ម៉ៅ ហាវណ្ណាល់ រដ្ឋមន្រ្តីទទួលបន្ទុក រដ្ឋលេខាធិការដ្ឋានអាកសចរណ៍ស៊ីវិល លោក ហួត ហាក់ រដ្ឋមន្រ្តីក្រសួងទេសចរណ៍ លោកអ្នកឧកញ៉ា ពុង ឃាវសែ ព្រមទាំងថ្នាក់ដឹកនាំជាច្រើនរូបទៀត។
គួរឱ្យដឹងដែរថា អាកាសយានដ្ឋានអន្តរជាតិតេជោ កម្រិត 4F ដែលអាចឱ្យយន្តហោះប្រភេទធំៗឆ្លងទ្វីបមកចុះចតបាន ត្រូវបានកសាងឡើងជាបីដំណាក់កាល ដោយដំណាក់កាលទី ១ មានផ្លូវរត់ចម្ងាយ ៤ គីឡូម៉ែត្រជាមួយនឹងមានសមត្ថភាពទទួលអ្នកដំណើរជាង ១៥ លាននាក់ក្នុងមួយឆ្នាំ នៅឆ្នាំ ២០២៥។ ក្នុងដំណាក់កាលទីពីរ ការបន្ថែមផ្លូវរត់ពីរបន្ថែមទៀតនឹងបង្កើនសមត្ថភាពអ្នកដំណើរដល់ ៣០ លាននាក់ នៅឆ្នាំ ២០៣០។ ដំណាក់កាលទីបី អាកាសយានដ្ឋាននេះនឹងពង្រីកបន្ថែមទៀតជាមួយនឹងការដាក់ឱ្យប្រើប្រាស់ផ្លូវរត់ទីបី ដែលអាចទទួលអ្នកដំណើរបានរហូតដល់ ៤៥ លាននាក់ នៅឆ្នាំ ២០៥០៕
