ពិតជាក្តៅគគុកណាស់ ក្រោយពីមានករណីអតីតទាហានថៃម្នាក់ បានលួចវាយឆ្មក់ទាហានខ្មែរដែលឈរជើងនៅប្រាសាទតាមាន់ធំ កាលពីថ្ងៃទី ១៣ ខែកក្កដា ឆ្នាំ ២០២៥ កន្លងទៅ ដែលខាងភាគីថៃបានសរសើរជនដៃដល់មិនដាច់ពីមាត់ចំពោះការប្រព្រឹត្តទង្វើអសីលធម៌នេះ បង្កឱ្យមានស្ថានការណ៍កាន់តែតានតឹងរវាងប្រទេសទាំងពីរ។
យ៉ាងណាមិញ ក្រោយពីកើតហេតុ ជនដៃដល់ខាងលើក៏ត្រូវបានអាជ្ញាធរថៃនាំខ្លួនយកទៅសួរនាំ ហើយអះអាងថាកំពុងឃាត់ខ្លួនទុក ដើម្បីចាត់ការទៅតាមផ្លូវច្បាប់។ ប៉ុន្តែថ្មីៗនេះ សារព័ត៌មាន Thairath បានចុះផ្សាយថា បើយោងទៅតាមប្រភពព័ត៌មានពីកន្លែងកើតហេតុ អតីតទាហានថៃរូបនេះអាចនឹងវាយខុសមនុស្ស ដោយច្រឡំថាជាទាហានមួយរូបទៀត ដែលបានចង្អុលមុខទាហានថៃកាលពីពេលកន្លងទៅ។
ដោយឡែក ខាងអាជ្ញាធរថៃបានអះអាងថា ជនដៃដល់បានមកដល់ទីនេះក្នុងនាមជាអ្នកទេសចរ ហើយករណីនេះគឺជាគំនុំផ្ទាល់ខ្លួន មិនទាក់ទងជាមួយនឹងទាហាននោះទេ។ ហើយខាងអាជ្ញាធរថៃក៏បានសន្យាថានឹងរឹតបន្តឹង និង ការពារជាងមុនចំពោះបុគ្គលដែលព្យាយាមញុះញង់ឱ្យស្ថានការណ៍កាន់តែតានតឹងផងដែរ៕
ប្រភព៖ Thairath
