មហាជនអ្នកលេងបណ្តាញសង្គមហ្វេសប៊ុក ច្បាស់ជាបានជ្រាបមកហើយនូវរឿងរ៉ាងគួរឱ្យភ្ញាក់ផ្អើលមួយបានកើតឡើងទាំងកណ្តាលយប់កាលពីយប់ថ្ងៃទី ១ ខែឧសភា ឆ្នាំ ២០២៥ កន្លងទៅ វេលាម៉ោងប្រហែល ២៣ និង ៣០ នាទី មាន ដោយតាមរយៈវីដេអូបង្ហោះនៅលើបណ្តាញសង្គមបង្ហាញថា មានស្រ្តីម្នាក់បានជិះរថយន្ត TOYOTA Prius ពណ៌ទឹកប្រាក់ ត្រូវបានមនុស្សមួយក្រុមមានប្រុស និង ស្រី ជិះរថយន្តម៉ាក Ford Rabter ពណ៌ស មួយគ្រឿងបើកមកកាក់ពីមុខ រួចចុះមកស្រែកបង្ខំឱ្យស្ត្រីខាងលើចុះពីលើរថយន្ត លុះមិនព្រមចុះបុរសពាក់អាវខ្មៅ និង ស្រ្តីពាក់អាវលឿង បានប្រើអំពើហិង្សាតែម្តង ដោយមានវាយដោយដំបង ហើយបើករថយន្តដេញបំបុកពីក្រោយ។
បន្ទាប់ពីកើតហេតុការណ៍នេះ កម្លាំងផ្នែកជំនាញនៃអធិការដ្ឋាននគរបាលខណ្ឌទួលគោក បានចុះអន្តរាគមន៍ និង បានធ្វើការឃាត់ខ្លួនជនសង្ស័យចំនួន ២ នាក់ ពីបទហិង្សាដោយចេតនាមានស្ថានទម្ងន់ទោស ដោយជនបង្កបានប្រើដំបងមូល, ប្រើដៃ និង បើករថយន្តម៉ាក Raptor ដេញបំបុកជនរងគ្រោះ បណ្ដាលឱ្យជនរងគ្រោះរបួសជាច្រើនកន្លែង និង ខូចខាតរថយន្តមុខក្រោយទាំងស្រុង។ រីឯជនសង្ស័យជាបក្ខពួក ១ នាក់ទៀត ភេទប្រុស បានគេចខ្លួនបាត់។
តាមព័ត៌មានដែលទទួលបានពីទំព័រហ្វេសប៊ុកផ្លូវការរបស់ ក្រុមការងារព័ត៌មាន និង ប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ បានឱ្យដឹងថា នគរបាលខណ្ឌទួលគោកបានឃាត់ខ្លួនស្រ្តី ២ នាក់នោះ គឺក្នុងករណីហិង្សាដោយចេតនាដោយស្ថានទម្ងន់ទោស។ ដោយឡែក បច្ចុប្បន្ននេះជនសង្ស័យទាំង ២ នាក់ខាងលើ បាន និង កំពុងឃាត់ខ្លួនជាបណ្ដោះអាសន្ននៅអធិការដ្ឋាននគរបាលខណ្ឌទួលគោក ដើម្បីសាកសួរ និង ចាត់ការបន្តតាមនីតិវិធី។
ក្នុងករណីហិង្សានេះ បានធ្វើឱ្យផ្អើលឆោឡោទាំងយប់នេះ កើតចេញពីភ្លើងស្នេហាត្រីកោណ ដោយមុនឈានដល់កើតហេតុការណ៍នេះ ភាគីជនសង្ស័យគឺជាប្រពន្ធដើម បានបញ្ជាក់ក្នុងវីដេអូលើហ្វេសប៊ុកថា ស្រ្តីឈ្មោះ ចាប ចិន្តា តែងតែមករវីរវល់ជាមួយប្តីរបស់ខ្លួន ដើម្បីទាក់ទងគ្នា លុះមកដល់ថ្ងៃកើតហេតុនារីខាងលើមកគោះទ្វារផ្ទះដើម្បីរកប្តីរបស់ខ្លួន ទើបធ្វើឱ្យខ្លួនខឹងសម្បា ហើយបបួលបងប្អូននាំគ្នាព្រួតដេញវាយតែម្តង។
យ៉ាងណាមិញ ជុំវិញករណីខាងលើត្រូវបានមហាជននៅក្នុងបណ្តាញសង្គមហ្វេសប៊ុកបានចេញមកបញ្ចេញការវែកញែករៀងៗខ្លួន ដោយក្នុងនោះ ក៏ឃើញជំទាវ ចន ច័ន្ទលក្ខិណា បានបង្ហាញមតិរបស់ខ្លួនជាបន្តបន្ទាប់ពី ច្បាប់ឯកពន្ធភាព អនុវត្តន៍លើស្រីយកប្តីគេផង ដើម្បីឱ្យអេតាស៊ីវិលមានតម្លាភាព។
ជាក់ស្តែងនៅថ្ងៃទី ០៣ ខែឧសភា ឆ្នាំ ២០២៥ នេះ ជំទាវ ចន ច័ន្ទលក្ខិណា បានចេញមកបង្ហោះសារជាថ្មីម្តងទៀត ដោយលោកជំទាវមិនចង់ឃើញមានអំពើហិង្សានោះឡើយ ប៉ុន្តែក៏ត្រូវតែស្វែងរកយុត្តិធម៌ឱ្យប្រពន្ធដើមដែរ ខណៈដូចពាក្យចាស់ពោលថា មានភ្លើង ទើបមានផ្សែង។
ក្នុងនោះ សារទី ២ ជំទាវ ចន ច័ន្ទលក្ខិណា រៀបរាប់ថា៖ «ដឹងរឿងខ្លះហើយ មិនធម្មតា ហើយខ្ញុំសុំសរសើរ នៅក្មេង តែឆ្លាត ឆ្លាតរឿងមហាអាក្រក់ មហាល្បិច យក្ខិណីដើរតួជាជនរងគ្រោះ . ខ្លែងស្រាកពាក់មុខហង្ស» និង សារទី ២ គឺ៖ «ខ្ញុំមិនគាំទ្រអំពើហិង្សា តែជាមនុស្សមិនមែនព្រះទេ មានភ្លើងទើបមានផ្សែង។ ខ្ញុំជឿជាក់លើច្បាប់ ដោយពិនិត្យលើអង្គហេតុឱ្យបានដិតដល់ ដើម្បីផ្តល់យុត្តិធម៌ជូនភរិយាមានអេតាស៊ីវិល»៕
