មួយរយៈក្រោយនេះ ឃើញថាបុគ្គលល្បីៗនៅកម្ពុជាមួយចំនួន បានចាយលុយទិញនាឡិកាដៃថ្លៃៗ តម្លៃដល់ទៅខ្ទង់ម៉ឺន ខ្ទង់សែនដុល្លារ ដែលអាចទិញផ្ទះវីឡាមួយ ឬពីរខ្នងរស់នៅយ៉ាងស្តុកស្តម្ភ។ តែយ៉ាងណាមិញ បើអ្នកដឹងពីនាឡិកាដៃ ដែលថ្លៃបំផុតនៅក្នុងលោក ជឿជាក់ថា អ្នកនឹងមានអារម្មណ៍ថា នាឡិកាត្រឹមខ្ទង់ម៉ឺន ខ្ទង់សែនដុល្លារ នៅថោកឆ្ងាយនៅឡើយ។ យើងសូមបង្ហាញនាឡិកាដៃចំនួន ១០ ម៉ូដ និង ១០ ម៉ូឌែល ដែលនៅរក្សាតំណែង ជានាឡិកាដៃថ្លៃបំផុតនៅក្នុងពិភពលោកមកទល់ឆ្នាំ ២០២៥។
១. នាឡិកា The Graff Diamonds Hallucination
នាឡិកានេះតម្លៃ ៥៥ លានដុល្លារ ផលិតឆ្នាំ ២០១៤។ វាធ្វើឡើងពីពេជ្រចម្រុះពណ៌ ១១០ ការ៉ាត់ រួមមាន ពេជ្រពណ៌ផ្កាឈូក ពណ៌ខៀវ ពណ៌បៃតង ពណ៌ទឹកក្រូច និង ពណ៌លឿង។
២. នាឡិកា The Graff Diamonds’ Fascination
ជាប្រ៊េនតែមួយ តែផលិតឆ្នាំ និង ម៉ូដខុសគ្នា។ វាមានតម្លៃ ៤០ លានដុល្លារ និង ផលិតឆ្នាំ ២០១៥។ វាធ្វើឡើងពីពេជ្រស 152.96 ការ៉ាត់ និង ពេជ្ររាងតំណក់ទឹក 38.13 D នៅចំកណ្តាល។
៣. នាឡិកា Patek Philippe Grandmaster Chime
នាឡិកានេះមានតម្លៃ ៣១ លានដុល្លារ និង ផលិតឆ្នាំ ២០១៩។ ជាមួយម៉ូដ និង ឈ្មោះរបស់វា បញ្ជាក់ពីភាពទំនើប កិត្យានុភាព និង សិល្បៈហត្ថកម្មដ៏អស្ចារ្យ។
៤. នាឡិកា The Breguet 1160
នាឡិកានេះមានតម្លៃ ៣០ លានដុល្លារ និង ផលិតឆ្នាំ ២០០៨។
៥. នាឡិកា Jaeger-LeCoultre Joaillerie 101 Manchette
នាឡិកានេះមានតម្លៃ ២៦ លានដុល្លារ និង ផលិតឆ្នាំ ២០១២។ នាឡិកានេះធ្វើឡើងដើម្បីថ្វាយដល់ម្ចាស់ក្សត្រី Elizabeth II ក្នុងឱកាសព្រះរាជពិធីបុណ្យចម្រើនព្រះជន្ម គម្រប់ ៦០ ឆ្នាំ នៃការឡើងគ្រងរាជ្យសម្បត្តិ។ វារំលេចដោយត្បូងពេជ្រ ៥៧៦ គ្រាប់។
៦. នាឡិកា Chopard 201-Carat Watch
នាឡិកានេះមានតម្លៃ ២៥ លានដុល្លារ និង ផលិតឆ្នាំ ២០១៤។ វាធ្វើឡើងរួមបញ្ចូលត្បូងពេជ្ររាងបេះដូងចំនួន ៣ គឺ ត្បូងពណ៌ឈូកទំហំ ១៥ ការ៉ាត់, ត្បូងពណ៌ខៀវ ១២ ការ៉ាត់ និង ត្បូងពណ៌ស ១១ ការ៉ាត់ អមដោយត្បូងផ្សេងទៀត ១៦៣ ការ៉ាត់។
៧. នាឡិកា Patek Philippe Supercomplication
នាឡិកានេះមានតម្លៃ ២៤ លានដុល្លារ និង ផលិតឆ្នាំ ១៩៣៣។ តម្លៃខ្ពស់នេះ បានមកពីការដាក់ដេញថ្លៃនៅប្រទេសស្វីសក្នុងឆ្នាំ ២០១៤។
៨. នាឡិកា Jacob & Co. Billionaire Watch
នាឡិកានេះមានតម្លៃ ១៨ លានដុល្លារ និង ផលិតឆ្នាំ ២០១៨។
៩. នាឡិកា Paul Newman’s Rolex Dayton
នាឡិកានេះមានតម្លៃ ១៧,៧៥ លានដុល្លារ និង ផលិតក្នុងឆ្នាំ ១៩៦០។ វាជានាឡិការបស់តារាសម្តែងជើងចាស់ដ៏ល្បី លោក Paul Newman ដែលត្រូវបានប្រពន្ធរបស់លោកកុម្មង់ ធ្វើជាកាដូពិសេសសម្រាប់លោក។ តម្លៃខ្ពស់នេះ បានមកពីការដាក់ដេញថ្លៃកាលពីឆ្នាំ ២០១៧។
១០. នាឡិកា Patek Philippe 1518
នាឡិកានេះមានតម្លៃ ១១,១ លានដុល្លារ និង ផលិតឆ្នាំ ១៩៤១។ វាធ្លាប់ជាកម្មសិទ្ធិរបស់ស្តេច Farouk នៃប្រទេសអេហ្ស៊ីប ហើយត្រូវបានដាក់ដេញថ្លៃ បានតម្លៃនេះនៅក្នុងឆ្នាំ ២០១៦៕
ប្រភព៖ mygemma
