ពិតជាមោទកភាពណាស់សម្រាប់កម្ពុជា ដែលម៉ាកដ៏ប្រណីតរបស់អ៊ីតាលី BVLGARI បានជ្រើសរើសទីតាំងរៀបចំកម្មវិធីរាត្រីសមោស BVLGARI AETERNA នៅឯប្រាសាទបាយ័ន ទឹកដីខេត្តសៀមរាប ប្រទេសកម្ពុជា។ កម្មវិធីបានរៀបចំឡើងជាលក្ខណៈឯកជន និង ផ្តាច់មុខបំផុត កាលពីរាត្រីថ្ងៃទី ២១ ម្សិលមិញ ដោយមានការចូលរួមពីសំណាក់ភ្ញៀវលំដាប់ៗទាំងជាតិ និង អន្តរជាតិ មកពីជុំវិញពិភពលោក។
ក្នុងឱកាសនេះ វត្តមានភ្ញៀវចូលរួមបានក្លាយជាផ្នែកមួយដ៏សំខាន់ ដែលធ្វើឱ្យកម្ពុជាកាន់តែមានគេស្គាល់ មានភាពលេចធ្លោ និង ល្បីល្បាញជាសកល។ ជាក់ស្តែង ក្នុងនោះឃើញមានវត្តមានពីតារាល្បីៗដូចជា កញ្ញា ស៊ីន យូប៊ីន, តារាសម្តែងរបស់ថៃ កញ្ញា Mai Davika, តារាសម្តែងថៃ Mile Phakphum, តារាសម្តែងសិង្ហបុរី Shawn Thia, តារាសម្តែងសិង្ហបុរី Ayden Sng, តារាចម្រៀងវៀតណាម Ho Ngoc Ha, បវរកញ្ញាហ្វីលីពីន និង ជា Miss Univers ២០១៥ ឈ្មោះ Pia Wurtzbach ព្រមទាំងតារាល្បីៗជាច្រើនទៀត។ ជាពិសេសឃើញមានវត្តមានពីបុគ្គលអភិជន អ្នកមានមុខមាត់នៅក្នុងសង្គម និង អ្នកមានឥទ្ធិពលជាច្រើនមកពីជុំវិញពិភពលោក។ មិនតែប៉ុណ្ណោះ ក៏មានវត្តមានស្ត្រីទី ១ នៃកម្ពុជា លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ផងដែរ។
កាន់តែធ្វើឱ្យកម្ពុជាល្បីរន្ទឺ សារព័ត៌មានហ្វេហ្សិនលំដាប់ពិភពលោកមួយចំនួន ក៏បានចុះមកថត និង សម្ភាសតារាអន្តរជាតិ ដែលចូលរួមកម្មវិធីផងដែរ។ តួយ៉ាង ដូចជាទស្សនាវដ្តីហ្វេហ្សិន Harper’s BAZAAR និង ទស្សនាវដ្តី L’Officiel ជាដើម។ ហើយរឹតតែសំខាន់ មុនពេលកម្មវិធីចាប់ផ្តើម តារាល្បីៗប្រចាំម៉ាក BVLGARI ក៏បាននាំគ្នាថតបង្ហាញម៉ូដខូឡិកហ្សិនគ្រឿងអលង្ការ BVLGARI នៅតាមប្រាសាទរបស់យើងទៀតផង។
តាមរយៈកិច្ចសម្ភាសជាមួយសារព័ត៌មានក្នុងស្រុក នៅពេលសួរពីមូលហេតុដែលខេត្តសៀមរាប ត្រូវបានជ្រើសរើសរៀបចំការបង្ហាញម៉ូដ BVLGARI លោក Jeffery Hang នាយកគ្រប់គ្រងម៉ាកប្រចាំតំបន់ បានលើកឡើងថា ជាដំបូងសូមថ្លែងអំណរគុណដល់ លោកជំទាវ បណ្ឌិត ពេជ ចន្ទមុន្នី ហ៊ុន ម៉ាណែត ដែលបានណែនាំ BVLGARI ដើម្បីស្វែងរកលទ្ធភាព ក្នុងការរៀបចំព្រឹត្តិការណ៍នេះ កាលពី ១ ឆ្នាំមុន។ លោកបានជឿជាក់យ៉ាងមុតមាំថា តម្លៃ BVLGARI ជាពិសេសគ្រឿងអលង្ការទាំងនេះ ដែលត្រូវបានដាក់ឈ្មោះជាចង្កោមថា «Aeterna» មានទំនាក់ទំនងយ៉ាងរឹងមាំ ជាមួយនឹងរឿងគ្រប់យ៉ាង ដែលតំណាងឱ្យខេត្តសៀមរាប ជាក់ស្តែងប្រាសាទអង្គរវត្តតែម្តង៕
