នេះជាលើកទី ៣ ហើយ ដែលតារាសម្តែងស្រីជួរមុខកម្ពុជា កញ្ញា ស៊ីន យូប៊ីន បានបង្ហាញវត្តមានទទួលពានរង្វាន់នៅក្នុងកម្មវិធី HOFS (Hall Of Fame Singapore) នៅប្រទេសសិង្ហបុរី។ សម្រាប់ឆ្នាំ ២០២៥ នេះ នាងទទួលបានពានរង្វាន់លើផ្នែក The Iconic Figure of Social Media ខណៈពានរង្វាន់របស់កម្មវិធី HOFS ជាការផ្តល់ជូនដល់អ្នកធុរកិច្ច និង បុគ្គលមានឥទ្ធិពលក្នុងបណ្តាញសង្គម មកពីបណ្តាប្រទេសផ្សេងៗ។
មិនខុសសព្វមួយដង ឱ្យតែមានឱកាសបង្ហាញខ្លួនលើឆាកអន្តរជាតិ ស៊ីន យូប៊ីន តែងមិនរំលងឡើយ ក្នុងការបង្ហាញអ្វីដែលជាអត្តសញ្ញាណជាតិតាមរយៈការស្លៀកពាក់។ ជាក់ស្តែង ជាមួយកម្មវិធី HOFS ដែលមានការចូលរួមពីតារាអន្តរជាតិជាច្រើន នាងបានគ្រងរ៉ូបដ៏ប្រណីត និង ទាក់ទាញ ដោយមានរំលេចចំណុចសំខាន់ៗបង្ហាញពីប្រទេសកម្ពុជា។
ជាមួយរ៉ូបពណ៌រាងបែកទឹកសមុទ្រ នៅលើតួរ៉ូបមានប៉ាក់ និង ឌិន រំលេចទៅដោយរូបតំណាងឱ្យខេត្តក្រុងនៃប្រទេសកម្ពុជាដូចជា៖ ព្រះបរមរាជវាំង តំណាងឱ្យរាជធានីភ្នំពេញ, រូបលោកតាដំបងគ្រញូង ខេត្តបាត់ដំបង, រូបឆ្នាំងដី ខេត្តកំពង់ឆ្នាំង, រូបដំរីជាន់ខ្លា ខេត្តកំពង់ធំ និង រូបតំណាងខេត្តក្រុងជាច្រើនទៀត អមនឹងរូបធម្មជាតិរួមមាន សត្វព្រាប ដើមត្នោត និង ឆ្នេរខ្សាច់សក្បុសនៃកោះរ៉ុងជាដើម។
ការច្នៃម៉ូដរ៉ូបមានលក្ខណៈលម្អិត និង មើលមកស៊ីវិល័យនេះ បើតាមការរៀបរាប់របស់ ស៊ីន យូប៊ីន គឺនាងចង់បង្ហាញពី ២៥ ខេត្តក្រុងនៃប្រទេសកម្ពុជា។ ហើយរ៉ូបនេះដែរ គឺនាង និង អ្នកច្នៃម៉ូដនៅស្រុកខ្មែរ បានសហការគ្នារំលេចវាឡើង៕
