ធ្មេចបើកៗ នៅសល់រយៈពេលប្រមាណជា ១០ ថ្ងៃទៀតប៉ុណ្ណោះ តារាចម្រៀងស្រី កញ្ញា រ៉ាប៊ី និង កីឡាករបាល់ទាត់កូនកាត់ខ្មែរ អាមេរិក Nick Taylor ដល់ថ្ងៃចូលរោងជ័យហើយ ក្រោយពីខាងប្រុសបានលុតជង្គង់សុំមិត្តស្រីរៀបការកាលពីខែមុនកន្លងទៅ។
ក្នុងនោះ តាមរយៈការបង្ហោះលើហ្វេសប៊ុកផេករបស់តារាចម្រៀងស្រី រ៉ាប៊ី បង្ហាញរូបភាពធៀបការបានឱ្យដឹងថា នាង និង លោក Nick Taylor ត្រៀមរៀបចំកម្មវិធីមង្គលការយ៉ាងធំដុំមួយនៅថ្ងៃទី ៩ ខែឧសភា ឆ្នាំ ២០២៥ ខាងមុខនេះ។
ស្របពេលប្រកាសថ្ងៃរៀបការនេះដែរ កញ្ញា រ៉ាប៊ី និង លោក Nick Taylor ក៏បានដឹកដៃគ្នាទៅថត Pre-Wedding នៅលើទឹកដីអង្គរយ៉ាងផ្អែមល្ហែម សម្រាប់ថ្ងៃពិសេសរបស់អ្នកទាំងពីរ។ លើសពីនោះផងដែរ ថ្មីៗនេះ កញ្ញា រ៉ាប៊ី ក៏បានបង្ហោះវីដេអូយ៉ាងអភិជនជាមួយគូដណ្តឹង នូវទិដ្ឋភាពចុះពីលើឧទ្ធម្ភាគចក្រ ហើយអមនឹងសារមួយឃ្លាថា៖ «កម្មវិធីលាភាពនៅលីវ»។
ដោយឡែក ងាកមកកាន់អ្នកគាំទ្រឯណោះវិញ កាន់តែអន្ទះសាចង់ឃើញពិធីមង្គលការរបស់កញ្ញា រ៉ាប៊ី និង លោក Nick Taylor នឹងរៀបចំយ៉ាងប្រណីតយ៉ាងណាទៅ បើគ្រាន់តែរូបភាព Pre-Wedding របស់គូស្នេហ៍មួយគូនេះ ស្អាតៗសុទ្ធតែជាឈុតប្រពៃណីខ្មែរប្រណីតៗ ស័ក្តិសមស្រស់ស្អាតស្រស់សង្ហាទាំងគូដូច្នេះ៕
សូមចុចទីនេះ ដើម្បីទស្សនាវីដេអូ៖
