សារព័ត៌មាន Daily Mails បានរាយការណ៍ពីរឿងរ៉ាវរបស់បុរសម្នាក់ ដែលក្លាយជាជនពិការ ក្រោយពីពាក់ស្បែកជើងខុសលេខនៅក្នុងមង្គលការខ្លួនឯងតែ ៣ ម៉ោងសោះ។
តាមព័ត៌មានបានឱ្យដឹងថា បុរសរូបនេះមានឈ្មោះ Martin គេបានចូលរោងការកាលពីឆ្នាំ ២០១៩ កន្លងទៅ។ Martin គឺជាអ្នកជំងឺទឹកនោមផ្អែម ដែលមានស្បែកជើងពិសេសផ្ទាល់ខ្លួនដើម្បីជួយការពារចរន្តឈាមនៅជើង ប៉ុន្តែក្នុងថ្ងៃរៀបការ Martin ចង់ពាក់ស្បែកជើងស្បែក ទើបកុម្ម៉ង់កាត់ពីមន្ទីរពេទ្យមួយកន្លែង។ ខាងមន្ទីរពេទ្យបានវាស់ជើង Martin ខុសដល់ទៅ ៣ ដង ហើយស្បែកជើងដែលបានមកក៏ចង្អៀតពិបាកពាក់ តែនៅពេល Martin ប្រាប់ពីបញ្ហានេះ ខាងមន្ទីរពេទ្យក៏តបថាពាក់សិនទៅ បន្តិចទៀតវានឹងរីកទំហំខ្លួនឯង។
Martin បានទ្រាំពាក់ស្បែកជើងនេះបានតែ ៣ ម៉ោងប៉ុណ្ណោះក្នុងពិធីមង្គលការ ព្រោះឈឺជើងខ្លាំងពេក ហើយប៉ុន្មានសប្តាហ៍ក្រោយមក មេជើងខាងស្តាំរបស់ Martin ក៏ចាប់ផ្តើមហើម និង ចេញខ្ទុះ រហូតដល់ត្រូវកាត់ចេញ។ លើសពីនេះទៀត ៤ ឆ្នាំកន្លងទៅនេះ Martin ក៏បានកាត់ម្រាមជើងខាងស្តាំអស់ ៣ ទៀត ដោយសារតែការរាលដាល ហើយត្រូវប្រើប្រដាប់ជំនួយក្នុងការដើរ។ យ៉ាងណាមិញ Martin បានសម្រេចចិត្តប្តឹងទៅកាន់មន្ទីរពេទ្យ ដែលចុងក្រោយខាងមន្ទីរពេទ្យក៏បានចេញមុខសុំទោស Martin ជាសារធារណៈ និង សន្យាថាមិនឱ្យរឿងនេះកើតឡើងម្តងទៀតនោះទេ៕
ប្រភព៖ Sanook
