គ្រួសារ តុងតុង ខ្វះខាតខ្លាំង សូម្បីបុណ្យសពក៏គ្មានលទ្ធភាពធ្វើ ស្រាប់តែ ចិត្ត កញ្ចនា និង មិត្តភក្តិជិតស្និទ្ធ ខ្នះខ្នែងប្រមូលបច្ច័យជួយសម្រាលបន្ទុកបានខ្លះ

កាលពីថ្ងៃទី ២០ ខែមេសា ឆ្នាំ ២០២៥ កន្លងទៅនេះ អ្នកលេងបណ្តាញសង្គមហ្វេសប៊ុក ជាពិសេសអ្នកសិល្បៈជាច្រើន បានបង្ហាញក្តីរន្ធត់ចិត្ត ក្រោយទទួលដំណឹងមរណភាពរបស់អ្នករាំមួយរូប ព្រោះវិបត្តិផ្លូវចិត្ត។

អ្នករាំមានប្រជាប្រិយភាព ដែលជាសមាជិកក្រុមរាំរបស់តារាចម្រៀងល្បីៗជាច្រើន ត្រូវបានគេស្គាល់ឈ្មោះក្នុងសិល្បៈថា តុងតុង។ ក្នុងនោះ តាមការឱ្យដឹងពីអ្នកស្និទ្ធស្នាលបានប្រាប់ថា តុងតុង មានវិបត្តិផ្លូវចិត្តជាយូរមកហើយ ហើយកាលពីរសៀលថ្ងៃទី ១៩ ខែមេសា ឆ្នាំ ២០២៥ លោកក៏បានសម្រេចចិត្តធ្វើអត្តឃាត ដោយចង-កសម្លាប់ខ្លួន។ បច្ចុប្បន្ន សពកំពុងធ្វើបុណ្យតាមប្រពៃណីនៅឯស្រុកកំណើតនាខេត្តស្ទឹងត្រែង។

យ៉ាងណាមិញ អ្វីដែលកាន់តែធ្វើឱ្យមហាជនសោកសង្រេងទៀតនោះ នៅថ្ងៃកើតហេតុភ្លាមៗ គ្រួសារ តុងតុង មិនមានលទ្ធភាពធ្វើបុណ្យទៅតាមប្រពៃណីនោះទេ ដោយគ្រួសារខ្វះខាតខ្លាំង។ ភ្លាមនោះ មិនបង្អង់ គេបានឃើញមិត្តភក្តិរបស់ តុងតុង ជាច្រើននាក់ រួមទាំងសិល្បករ សិល្បការិនី ធ្លាប់រួមការងារជាមួយ តុងតុង បានស្រុះដៃគ្នារៃអង្គាសបច្ច័យចូលបុណ្យសពរបស់ តុងតុង ដើម្បីយកប្រាក់ទៅសម្រួលរៀបចំពិធីបុណ្យសពផងដែរ។

ជាក់ស្តែង ក្រឡេកទៅមើល កញ្ញា ចិត្ត កញ្ចនា បានស្ទុះស្ទាភ្លាមៗ ដោយតារាចម្រៀង Original Song រូបនេះ បានប្រកាសនាំយកបច្ច័យពីមិត្តភក្ដិចូលបុណ្យសព តុងតុង និង ផ្ញើជូនក្រុមគ្រួសារនៃសព ដើម្បីធ្វើបុណ្យតាមប្រពៃណី។ លើសពីនោះ គេក៏បានឃើញ អ្នកនាង និរ័ត្ន, អ្នកនាង ចំរើន សុភ័ក្ត្រ ព្រមទាំងមិត្តភក្តិជាច្រើនទៀត ក៏បានជួយប្រមែប្រមូលថវិកាពីអ្នកស្គាល់ៗ តុងតុង យកទៅប្រគល់ជូនគ្រួសារសពផងដែរ៕