ថ្មីៗនេះ នៅប្រទេសថៃមានករណីស្រ្តីម្នាក់បានស្លាប់បាត់បង់ជីវិត ក្រោយពីបរិភោគទុរេនអស់ ២ ក្លែប ហើយផឹកភេសជ្ជៈផ្អែមមានជាតិហ្គាស់ទៅតាមក្រោយ។
ហេតុការណ៍នេះបានកើតឡើងកាលពីថ្ងៃទី ២២ ខែឧសភា ឆ្នាំ ២០២៥ កន្លងទៅ នៅស្រុក Non Suwan ខេត្ត Buriram ដោយស្រ្តីខាងលើនេះអាយុ ៥៨ ឆ្នាំ មានមុខរបរជាអ្នកលក់បាយម្ហូប។ តាមរយៈប្តីបានរៀបរាប់ឱ្យដឹងថា នៅថ្ងៃកើតហេតុប្រមាណម៉ោង ២ រសៀល ប្រពន្ធបានទៅទិញទុរេនមកហូប ដោយហូបអស់ប្រមាណ ២ ក្លែបតូច និង ក្រោយមកម៉ោងប្រហែល ៤ ល្ងាច ប្រពន្ធក៏បានផឹកភេសជ្ជៈផ្អែមមានជាតិហ្គាស់អស់ ១ កំប៉ុងទៀត។ លុះដល់ម៉ោង ៩ យប់ ស្រាប់តែប្រពន្ធប្រាប់ថា ណែនទ្រូងមិនស្រួលខ្លួន ទើបក៏បានស្លន់ស្លោហៅឡានសង្រ្គោះមក រីឯប្រពន្ធក៏សន្លប់បាត់មាត់ឈឹង។
ក្រោយមកក៏បានពឹងអ្នកជិតខាងឱ្យជូនប្រពន្ធទៅមន្ទីរពេទ្យ តែគួរឱ្យសោកស្តាយ បើទោះជាគ្រូពេទ្យខំជួយសង្រ្គោះយ៉ាងណា ក៏មិនអាចជួយឱ្យប្រពន្ធមានជីវិតបានឡើយ ហើយក្នុងនោះ ពេទ្យបានឱ្យដឹងមូលហេតុនៃការស្លាប់គឺបណ្តាលមកពីសាច់ដុំបេះដូងខ្វះឈាមភ្លាមៗ។ ដោយឡែក បុរសជាប្តីបានឱ្យដឹងទៀតថា តាមពិតទៅប្រពន្ធមានជំងឺសម្ពាធឈាមស្រាប់មកហើយ លុះដល់ហូបទុរេន ថែមជាមួយនឹងភេសជ្ជៈផ្អែមមានជាតិហ្គាស់ ទើបធ្វើឱ្យសម្ពាធឈាមកាន់តែឡើងខ្ពស់ រហូតឈានដល់ការបាត់បង់ជីវិត៕
ប្រភព៖ Khaosod
