និយាយពីស្រីស្អាត ខន សូរិយា ជាតារាសម្ដែងស្រីពន្លកថ្មីកំពុងមានសន្ទុះប្រជាប្រិយភាព និង ទីផ្សារខ្លាំងលើវិស័យសិល្បៈ ជាមួយសមត្ថភាព ទេពកោសល្យក្នុងវិស័យសម្ដែងរបស់នាង ដែលឃើញលេចមុខថតស្ប៉តពាណិជ្ជកម្ម សម្ដែងភាពយន្តខ្មែរជាច្រើនកន្លងមក ជាពិសេសបច្ចុប្បន្ន នាងកំពុងក្ដោបបានតំណែងជាតួឯកស្រីក្នុងភាពយន្តខ្នាតធំបន្តបន្ទាប់។
លើសពីនេះ តារាសម្ដែងស្រី ខន សូរិយា មិនត្រឹមតែមានទេពកោសល្យសម្ដែងយ៉ាងប៉ិនប្រសប់នោះទេ ថែមទាំងមានរូបសម្រស់កម្ពស់កម្ពរស្រស់ស្អាត ស្នាមញញឹមស្រស់មានមន្តស្នេហ៍ និង មានភាពក្រមិចក្រមើមគួរឱ្យស្រឡាញ់ ដែលបានឆក់យកបេះដូងមហាជនអ្នកគាំទ្រសរសើរជាច្រើន។
ដោយឡែក ស្របពេលកំពុងក្ដោបបានទីផ្សារសិល្បៈខ្លាំងនេះដែរ ថ្មីៗនេះ អ្វីដែលធ្វើឱ្យមហាជនកាន់តែចាប់អារម្មណ៍ខ្លាំងពីស្រីស្អាត ខន សូរិយា ខណៈបានឃើញនាងបង្ហាញវត្តមានក្នុងវិស័យបវរកញ្ញា ដែលបានចូលរួមជាបេក្ខភាពក្នុងកម្មវិធីប្រកួតសម្រស់ Miss Cosmo Cambodia 2025 នេះ។
នេះបើតាមរយៈរូបភាពប៉ុន្មានសន្លឹកបង្ហោះលើហ្វេសប៊ុកផេក Miss Cosmo Cambodia ក្នុងកម្មវិធីជួបជុំបង្ហាញមុខបេក្ខភាពជាផ្លូវការ ដោយឃើញ ខន សូរិយា ជាបេក្ខភាពមួយរូបក្នុងកម្មវិធីនេះ និង កំពុងទទួលបានការចាប់អារម្មណ៍ចែករំលែកពីបណ្ដាអ្នកគាំទ្ររបស់នាង ដែលបង្ហាញការគាំទ្រលើកទឹកចិត្តនាងក្នុងដំណើរការប្រកួតនេះពេញទំហឹងផងដែរ៕
