កន្លងមក មហាជននិយមតាមដានជីវិតឯកជនរបស់តារាចម្រៀង និង សម្តែង ម៉ានីតា ច្បាស់ជាបានជ្រាបមកហើយពីរឿងក្តីក្តាំងរបស់នាង ពាក់ព័ន្ធនឹងអតីតគូស្នេហ៍ គឺតារាប្រុស សន ពិសិដ្ឋ ពាក់ព័ន្ធនឹងឯកសារប្តឹងផ្តល់គ្នាឱ្យខាងប្រុសចូលមកដោះស្រាយ ខណៈគេចវេសជាច្រើនលើកច្រើនសានោះ។
ថ្មីៗនេះ តារាស្រី ម៉ានីតា ក៏បានចេញមកទម្លាយជាថ្មីពាក់ព័ន្ធនឹងការប្តឹងផ្តល់ទៅកាន់អតីតគូស្នេហ៍ពីករណីហិង្សាទៅកាន់ខ្លួន ដោយសាលដីកាពីថ្ងៃទី ១០ ខែមេសា ឆ្នាំ ២០២៥ ពីសាលាឧទ្ធរណ៍ គឺមិនមែនបន្ថយទោសអតីតគូស្នេហ៍ពី ២ ឆ្នាំ មកនៅសល់ ១ ឆ្នាំទេ គឺព្យួរទោសជនល្មើសឱ្យនៅក្រៅឃុំតែម្តង។
យ៉ាងណាមិញ នៅថ្ងៃទី ២៣ ខែមេសា ឆ្នាំ ២០២៥ កន្លងទៅនេះ តារាស្រី ម៉ានីតា បានចេញមកបញ្ជាក់ជាថ្មីម្តងទៀត ថានាងមានភស្តុតាងសំឡេង និង សាក្សីឃើញការប្រើហិង្សា ខណៈក្រោយទម្លាយរូបភាពរងអំពើហិង្សាពីអតីតគូស្នេហ៍ លោក សន ពិសិដ្ឋ មានការបញ្ចេញមតិមួយចំនួនតូច ថាមិនមែនជាការពិតផង។
តាមរយៈវីដេអូនោះដែរ តារាស្រី ម៉ានីតា បានឱ្យដឹងថា នាងចេញមកមិនមែនចង់បំពុលសង្គមអ្វីនោះឡើយ តែនាងចេញមកដើម្បីរកភាពយុត្តិធម៌សម្រាប់ខ្លួនឯង ក្រោយរងការឈឺចាប់អស់រយៈពេល ៤ ឆ្នាំ ពោលគឺចាប់ពីឆ្នាំ ២០២១ ដល់ ឆ្នាំ ២០២៥ នេះ។ លើសពីនោះ តារាស្រីរូបនេះ ក៏បានស្រែករកយុត្តិធម៌ជាថ្មី ព្រោះនាងមានភស្តុតាងគ្រប់គ្រាន់ហើយ។
គួររំឭកថា តារាស្រី ម៉ានីតា និង លោក សន ពិសិដ្ឋ ធ្លាប់មានទំនាក់ទំនងស្នេហានឹងគ្នា ប៉ុន្តែនៅអំឡុងឆ្នាំ ២០២១ អ្នកទាំង ២ ក៏បានបែកបាក់គ្នា ក៏ព្រោះតែស្នេហាត្រីកោណ ដោយកាលនោះមានការលើកឡើងថា ដោយសារខាងប្រុសមានអ្នកថ្មី។ បន្ទាប់មក ក៏មានការប្តឹងផ្តល់គ្នា រហូតមកទល់ពេលនេះ៕
សូមចុចទីនេះ ដើម្បីទស្សនាវីដេអូលម្អិត៖
