ស្របពេលបវរកញ្ញា ពេជ្រ វត្តីសារ៉ាវឌ្ឍី ប្រកាសថ្កោលទោសដាច់ខាតចំពោះបុគ្គល Nawat ម្ចាស់កម្មវិធី MGI ដែលបានយកវេទិកា MUT វាយប្រហារមកលើប្រមុខរដ្ឋាភិបាលកម្ពុជា មកដល់ថ្ងៃទី ៣ ខែសីហា ឆ្នាំ ២០២៥ នេះ គេបានឃើញកម្មវិធី MGI ប្រកាសដកតំណែងបវរកញ្ញារូបនេះ ចេញពីតំណែង 5th Runner up MGI 2022។
ក្នុងសេចក្ដីប្រកាសដកតំណែង និង សិទ្ធិរបស់ ពេជ្រ វត្តីសារ៉ាវឌ្ឍី ពីកម្មវិធី MGI នេះ បានធ្វើឡើងដោយសារការបំពានក្រមសីលធម៌របស់កម្មវិធី ដែលចោទមកលើ ពេជ្រ វត្តីសារាវឌ្ឍី ថានាងបានផ្សព្វផ្សាយព័ត៌មានមិនពិត និង និយាយបង្ខូចឈ្មោះជាសាធារណៈប៉ះពាល់កិត្តិយស មុខមាត់កម្មវិធី MGI ទៀតផង។
ដោយឡែក ក្រោយទទួលដំណឹងជុំវិញរឿងដកតំណែងនេះ ងាកមកមើលបវរកញ្ញា ពេជ្រ វត្តីសារ៉ាវឌ្ឍី វិញ ក៏បានឃើញនាងចែករំលែកសេចក្ដីប្រកាសនោះ ដោយចាត់ទុកជារឿងអស់សំណើច និង បានផ្ដាំទៅកាន់ម្ចាស់កម្មវិធី Nawat វិញថា ចំពោះតំណែង 5th Runner up MGI 2022 នេះ គឺអត់មានតម្លៃសម្រាប់នាង និង ប្រជាជនកម្ពុជាយូរមកហើយ។ លើសពីនេះ ចំពោះមកុដ MGI នោះ ពេជ្រ វត្តីសារ៉ាវឌ្ឍី ក៏ធ្លាប់ប្រាប់ឱ្យដឹងថានាងបានបោះចោលក្នុងធុងសំរាមយូរមកហើយដែរ។
ក្នុងនោះ ពេជ្រ វត្តីសារ៉ាវឌ្ឍី បានបង្ហោះរៀបរាប់ថា ៖ «សូមទោសណាលោកអ៊ំ ចង់អ៊ំដក ឬមិនដកមិនសំខាន់ទេ តែតំណែងមួយហ្នឹង អត់មានតម្លៃជាមួយខ្ញុំ និង ប្រជាជនខ្ញុំយូរហើយ ហើយបើអាចជួយសងលុយកម្លាំងញើសឈាមខ្ញុំមកវិញផង»។, «អ៊ំខឹងតីតី ព្រោះតីតីអត់ព្រមនៅខាងអ៊ំ ហើយមកប្រកាសដកអីគេ ខ្ញុំអត់មានកុងត្រាជាមួយអ៊ំទៀតផង មើលទៅអ៊ំប្រហែលច្រឡំថាមានសិទ្ធិជាមួយខ្ញុំមួយជីវិត»៕
