ពិតណាស់ មហាជនអ្នកគាំទ្ររបស់តារាប្រុសរូបសង្ហាលោក សេង មង្គល បានជ្រាបពីជីវិតសិល្បៈ ក៏ដូចជាជីវិតឯកជនរបស់លោក ដោយបច្ចុប្បន្នអាចចាត់ទុកជាតារាប្រុសមានភាពជោគជ័យមួយរូប ដ្បិតតែមួយរយៈក្រោយ លោកមិនសូវបង្ហាញសកម្មភាពលើសិល្បៈច្រើន ប៉ុន្តែតារាប្រុសរូបនេះតែងស្ដែងពីសកម្មភាពឯកជនផ្សេងៗជាមួយក្រុមគ្រួសារ។
ជាក់ស្ដែង កាលពីដើមឆ្នាំ ២០២៥ កន្លងទៅ លោក សេង មង្គល ក៏បានបង្ហាញភាពកតញ្ញូក្នុងនាមជាកូនប្រុស សម្រេចក្ដីស្រមៃមួយធ្វើដើម្បីអ្នកមានគុណ គឺបានរៀបចំសាងសងផ្ទះយ៉ាងធំប្រណីតមួយសម្រាប់ជូនប៉ាម៉ា់ក់ និង ជីដូន រស់នៅជុំគ្នាក្នុងជីវិតសាមញ្ញមួយ។
យ៉ាងណាមិញ ស្របពេលកំពុងសាងសង់ផ្ទះថ្មីដ៏ប្រណីតសម្រាប់គ្រួសារនេះដែរ តារាប្រុស សេង មង្គល ក៏បានងាកទៅបើករបរផ្ទាល់ខ្លួនមួយទៀត ដែលបានបង្ហាញសកម្មភាពរៀបចំបើកហាងកាហ្វេមួយមានឈ្មោះថា Freshie Coffee។
ដោយឡែក មកដល់ថ្មីៗនេះ បន្ទាប់ពីរៀបចំផ្ទះជិតរួចរាល់ រីឯហាងកាហ្វេក៏កំពុងបើកដំណើរការ ស្រាប់តែបានឃើញតារាប្រុសរូបនេះ បង្ហោះសារលើហ្វេសប៊ុកយ៉ាងភ្ញាក់ផ្អើល បង្ហាញពីការហួសចិត្តខ្លាំង ខណៈខំធ្វើការរកលុយចេញពីកម្លាំងញើសឈាម ពេលទទួលបានជោគជ័យបន្តិច បែរជាមានអ្នកថាលោកមានអ្នកចិញ្ចឹមទៅវិញ។
ក្នុងនោះ លោក សេង មង្គល បានរៀបរាប់លើហ្វេសប៊ុកថា ៖ «រឿងហួសចិត្ត ខំធ្វើការរកលុយចង់ងាប់ គ្រាន់តែឯងបើកហាងកាហ្វេ និង ធ្វើផ្ទះជូនលោកឪពុកអ្នកម្តាយក្នុងពេលតែមួយ អ្នកខ្លះក៏លើកតម្កើងឯងថាមានអ្នកចិញ្ចឹមភ្លែត (ចង់សើច) ហួសចិត្តចង់ចូលដល់ 80 យី… អីក៏ម៉េសៗ។ អូ មួយទៀត បើខ្ញុំមានអ្នកចិញ្ចឹមមែន ខ្ញុំនឹងបើក 10 ហាងក្នុងពេលតែមួយហើយ មួយវិញទៀត បើខ្ញុំធ្លាប់បានធ្វើការជាមួយនរណាម្នាក់ ហើយបោកលុយគេមែននោះ ម្ល៉េះពេលនេះគេមិនទុកឱ្យខ្ញុំរស់សុខស្រួលទេ ប្រហែលជាឡាយហែកខ្ញុំខ្ទេចខ្ទីហើយ Ok យល់នៅប៉ុណ្ណឹង…???»៕
