ងាយៗ ៨ វិធី ធ្វើវីដេអូប្រូម៉ូដផលិតផលឱ្យផ្ទុះល្បីងំ ហើយមិនបារម្ភត្រូវគេជេ-ររិះគន់ផ្អើលប្រទេសទេ

ការប្រូម៉ូដផលិតផលដោយបង្កើតមាតិកាវីដេអូខ្វះការពិចារណា បែបមើលងាយ ឬ បន្ទាបតម្លៃមនុស្ស វាអាចធ្វើឱ្យប៉ះពាល់មិនត្រឹមកេរ្តិ៍ឈ្មោះម៉ាកយីហោ ម្ចាស់ម៉ាកយីហោ និង BA ដែលជាអ្នកតំណាងនោះទេ តែវាជះផលប៉ះពាល់យ៉ាងខ្លាំងដល់តម្លៃអ្នកស្លូតត្រង់ដែលត្រូវបានគេអូសមកលេងសើចមើលងាយទៀតផង។ ចៀសវាងបញ្ហានេះ អ្នកគួរគប្បីបង្កើតមាតិកាដែលលផ្តល់ជាប្រយោជន៍ បង្ហាញពីការគោរព ឱ្យតម្លៃ និង លើកកម្ពស់វិញ។ ដូច្នេះដើម្បីប្រូម៉ូដផលិតផលប្រកបដោយប្រសិទ្ធភាព បង្កើតភាពជឿជាក់ និង គុណតម្លៃ អ្នកអាចប្រមូលគំនិតសម្រាប់មាតិកាតាមចំណុចមួយចំនួនដូចខាងក្រោម។

១. បង្ហាញភស្តុតាងរបស់អតិថិជន

ធ្វើវីដេអូបង្ហាញពីអ្នកដែលទទួលបានលទ្ធផល ឬ អត្ថប្រយោជន៍ពីផលិតផលរបស់អ្នក។ អាចបង្ហាញអំពីរឿងរ៉ាវដែលពួកគេសម្រេចចិត្តប្រើ និង ជំរុញដល់ការរស់នៅរបស់ពួកគេ។ អ្នកអាចបង្ហាញបុគ្គលផ្សេងៗគ្នា ដែលទទួលបទពិសោធពីផលិតផល ដោយមិនប្រៀបធៀបពួកគេជាមួយអ្នកដទៃ ពោលត្រឹមប្រៀបធៀបមុន និង ក្រោយពេលពួកគេប្រើប៉ុណ្ណោះ។

២. បង្រៀនរបៀបប្រើ

បង្រៀនអ្នកទស្សនាពីរបៀបប្រើផលិតផលប្រកបដោយប្រសិទ្ធភាព។ ត្រង់ចំណុចនេះ ម៉ាកយីហោរបស់អ្នកនឹងត្រូវបានអ្នកទស្សនាឃើញថា ជាអ្នកជួយ និង ចែករំលែកចំណេះដឹង។ ជៀសវាងការបញ្ចុះបញ្ចូលថា ផលិតផលអ្នកមិនអាចខ្វះបាន តែជំនួសមកវិញ ផ្តោតលើរបៀបដែលផលិតផលអាចបង្កើតជំនាញ ឬ បង្កើនភាពឆ្លាតវៃនៅក្នុងរបៀបរស់នៅប្រចាំថ្ងៃ។

៣. ឈុតក្រៅឆាក

បង្ហាញពីដំណើរការនៃការបង្កើតផលិតផល ដោយសង្កត់ធ្ងន់លើការយកចិត្តទុកដាក់ ការខិតខំប្រឹងប្រែង ការថែទាំ និង តម្លៃនៅពីក្រោយវា។ អ្នកអាចបង្ហាញពីការប្តេជ្ញាដើម្បីគុណភាព ជាជាងលើកតម្កើងផលិតផលធ្វើសម្រាប់តែចង្កោមមនុស្សខ្ពង់ខ្ពស់។

៤. មាតិកាបង្កើតដោយអ្នកប្រើប្រាស់

ជាវីដេអូបង្កើតឡើងដោយអ្នកមានបទពិសោធជាមួយផលិតផលផ្ទាល់។ វីដេអូបែបនេះ វានឹងបង្កើតទំនុកចិត្ត និង សហគមន៍សម្រាប់អ្នកទស្សនា។

៥. រឿងរ៉ាវជំរុញចិត្ត

ចែករំលែករឿងរ៉ាវនៃរបៀបដែលផលិតផលអាចធ្វើឱ្យអតិថិជនសម្រេចគោលដៅ ឬ ឆ្លងកាត់ឧបសគ្គរបស់ពួកគេ។ ផ្តោតការលើកកម្ពស់ និង ភាពវិជ្ជមាន ជាជាងការរស់នៅដោយខានផលិតផលរបស់អ្នកមិនបាន។

៦. សំណើច និង ទំនាក់ទំនង

បង្កើតវីដេអូបែបកំប្លែងសើច ជាមាតិកាដែលធ្វើឱ្យផលិតផលរបស់អ្នកមានការចងចាំ និង ចែករំលែកតគ្នា។ ទោះជាវីដេអូកំប្លែង តែមិនត្រូវកំប្លែងបែបចំអក ឬ មើលងាយនរណាម្នាក់ឡើយ។

៧. ដោះស្រាយបញ្ហា

បង្ហាញពីបញ្ហាដែលមាន និង​ របៀបដែលផលិតផលអាចដោះស្រាយបញ្ហាបាន។ អ្នកអាចចាប់មុំបញ្ហាជាការចែករំលែកបទពិសោធ រួចបង្ហាញដំណោះស្រាយជាមួយផលិតផល ដែលជំនាញទៅលើបញ្ហានោះ។

៨. មាតិកាជំរុញឱ្យតម្លៃ

ចែករំលែកចំណុចសំខាន់នៃម៉ាកយីហោដូចជា បេសកកម្ម ចក្ខុវិស័យ តម្លៃ និង ការប្តេជ្ញា ដើម្បីផ្តល់ផលវិជ្ជមាន។ បង្ហាញរបៀបដែលផលិតផលអាចជាចំណែកមួយធ្វើឱ្យពិភពលោកល្អប្រសើរ ជាជាងធ្វើឱ្យមនុស្សមានតម្រូវការវាតែមួយមុខ៕