កាលពីពេលថ្មីៗកន្លងទៅនេះ មហាជនអ្នកគាំទ្រ និង មិត្តទាំងក្នុង ក្រៅសិល្បៈជាច្រើន បានបង្ហាញក្តីបារម្ភដល់តារាកំប្លែងជើងចាស់ នាយកុយ ដែលបានធ្វើការវះកាត់យកដុំសាច់ដុះក្នុងពោះវៀនចេញនៅឯមន្ទីរពេទ្យនាប្រទេសថៃ។
ក្នុងនោះដែរ ក្រោយវះកាត់បានប្រមាណជិត ៤ ថ្ងៃ ពោលគឺចាប់ពីថ្ងៃទី ០៧ ខែកុម្ភៈ ឆ្នាំ ២០២៥ រហូតដល់យប់ថ្ងៃទី ១០ ខែកុម្ភៈ ឆ្នាំ ២០២៥ កន្លងទៅ កូនប្រុសស្រីរបស់ នាយកុយ ក៏បានបង្ហាញពីស្ថានភាពជំងឺរបស់ឪពុក បានក្រោកពីសន្លប់ និង បានបញ្ជូនចេញពីបន្ទប់ ICU មកកាន់បន្ទប់ធម្មតាវិញ។
យ៉ាងណាមិញ មកដល់ពេលនេះ នាយកុយ ក៏បានវិលត្រឡប់មកកាន់ប្រទេសកម្ពុជាវិញហើយដែរ ប៉ុន្តែសុខភាពនៅមិនទាន់រឹងមាំនៅឡើយនោះទេ។ ម្យ៉ាងវិញទៀត ក្រោយវះកាត់យកដុំសាច់ចេញរួចរាលហើយនោះ នាយកុយ ក៏ត្រូវបន្តទៅព្យាបាលចាក់គីមីនៅថៃវិញទៀតនៅខែក្រោយ។
ដោយឡែក ក្រោយពេលមកដល់កម្ពុជាភ្លាម ងាកទៅកាន់ នាយក្រឹម ជាមិត្តសម្លាញ់ និង ធ្លាប់ជាដៃគូលលេងកំប្លែងជាមួយគ្នាវិញ ហាក់មិនបង្អង់យូរឡើយ ដោយលោកបានទៅសួរសុខទុក្ខ នាយកុយ ដល់ផ្ទះ។ ក្នុងនោះ មហាជនបានលើកឡើងពីមិត្តភាពរបស់តារាកំប្លែងទាំង ២ ថា ពិតជាមិនសាបសូន្យមែន រាប់អានគ្នាតាំងពីនៅកំលោះរហូតចាស់ៗមានចៅរៀងៗខ្លួន៕
