ជាការពិតណាស់ មហាជនដែលធ្លាប់តាមដានទស្សនាកម្មវិធីប្រកួត The Rapper Cambodia រដូវកាលទី ១ ច្បាស់ជានៅចាំនៅឡើយបេក្ខភាពឆ្នើមមួយរូប គឺលោក GMENGz ជាកូនក្រុមរបស់ Coach នរិទ្ធ។
បើទោះជាមិនបានបោះជំហានទៅកាន់វគ្គផ្តាច់ព្រ័ត្រ និង ដណ្តើមបានពានរង្វាន់ក្តី តែតារាចម្រៀងរ៉េបពន្លកក្រោយ GMENGz នៅតែក្តោបបានប្រជាប្រិយភាពពីសំណាក់យុវវ័យមិនខុសពីមិត្តរួមការប្រកួតនោះឡើយ។
ជាក់ស្តែង ក្រោយពីបញ្ចប់ការប្រកួត GMENGz ក៏បានផលិតបទចម្រៀងថ្មីៗជាបន្តបន្ទាប់ ដោយទទួលបានការគាំទ្រយ៉ាងខ្លាំងពីមហាជន ដោយចម្រៀងមួយបទៗរបស់ GMENGz សុទ្ធសឹងពីរោះៗ មានបារ៉ូលគួរឱ្យចាប់អារម្មណ៍។
ម្យ៉ាងវិញទៀត អ្វីដែលកាន់តែចាប់អារម្មណ៍ទៀតនោះ GMENGz ក៏បានក្លាយទៅជាតារាចម្រៀងរ៉េបវ័យក្មេងមួយរូប ដែលបានផលិតចម្រៀងរួមគ្នានឹងរៀមច្បងក្នុងផលិតកម្មបារមី រួមមានលោក វណ្ណដា, លោក នរិទ្ធ និង លោក វណ្ណថាន ព្រមទាំងម្ចាស់ពាន The Rapper Cambodia រដូវកាលទី ២ លោក យូហៃ ទៀតផង។
ដោយឡែក បើនិយាយពីប្រជាប្រិយភាពលោក GMENGz គឺមិនត្រឹមតែកើតឡើងពីសមត្ថភាពនៃការរ៉េបរបស់លោកតែម្យ៉ាងនោះទេ ពោលគឺសូម្បីតែអត្តចរិត រូបសម្រស់របស់លោក ក៏ជាភាពទាក់ទាញធ្វើឱ្យអ្នកគាំទ្រស្រឡាញ់ចូលចិត្តដល់លោករូបដែរ។
តួយ៉ាង ថ្មីៗនេះ អ្នកគាំទ្រតែងតែចែករំលែកនូវរូបភាពឃ្យូដៗកាលពីនៅក្មេងរបស់ GMENGz មានមុខប៉ោងៗ សាច់ទ្រលុកទ្រលន់ និង លើកឡើងថា តារាចម្រៀងរ៉េបរូបនេះ ឃ្យូដគួរឱ្យស្រឡាញ់តាំងពីតូចមកម្ល៉េះ៕
