រយៈពេលប្រមាណជា ១ ឆ្នាំហើយ ដែលតារាសម្ដែង លោក សឿន វីតា បានផ្ទុះព័ត៌មានជំពាក់បំណុលខ្ទង់ជាង ២០ ម៉ឺនដុល្លារ ដោយក្នុងអំឡុងពេលនេះ លោក និង គ្រួសារ បានប្រឹងប្រែងរកស៊ីលក់ដូរម្ហូបអាហារផ្សេងៗទាំងយប់ទាំងថ្ងៃ ដើម្បីយកលុយទៅសងបំណុលគេ។
ផ្ដើមដំបូង លោក សឿន វីតា និង ភរិយា ដើរដល់ចំណុលទ័លខ្លាំង សូម្បីកន្លែងស្នាក់នៅក៏មិនសមរម្យ ណាមួយត្រូវម្ចាស់បំណុលតាមទារលុយគ្រប់ពេលវេលា ហើយក្នុងនាមជាមេគ្រួសារ លោក សឿន វីតា ត្រូវរកលុយចិញ្ចឹមបីបាច់កូនតូចៗក្នុងបន្ទុក ប៉ុន្ដែកាលនោះអាចនិយាយបានថា លោកចាប់ផ្ដើមពីបាតដៃទទេឡើងវិញ គឺលក់ភ្លាក្ដាម និង កូនត្រីអបតាមអនឡាញ់ មួយថ្ងៃបានកម្រៃបន្តិចបន្តួចដើម្បីរស់នៅបន្ត។
បន្ទាប់ពីការខំប្រឹងអស់មួយរយៈធំសឹងមិនស្គាល់ពេលសម្រាក មកដល់ពេលនេះ លោក សឿន វីតា បានឱ្យដឹងថា លោកបានសងទៅម្ចាស់បំណុលបានខ្ទង់ ៤០ ភាគរយហើយ បើគិតជាទឹកប្រាក់គឺខ្ទង់ ១០ ម៉ឺនដុល្លារហើយ ចំណែកម្ចាស់បំណុល ៤០ ភាគរយទៀតកំពុងរកលុយបន្តបន្ទាប់។ ដោយឡែកចំពោះម្ចាស់បំណុល ២០ ភាគរយទៀត លោកនៅមិនទាន់បានសងនៅឡើយ។
តាមការបង្ហោះរបស់លោក សឿន វីតា បានរៀបរាប់ថា ៖ «ខ្ញុំដើរដល់ចំណុចនេះហើយ គឺល្អប្រសើរណាស់ហើយ បំណុលជាង 20 ម៉ឺនដុល្លារសងគេនៅតែជាង 10 ម៉ឺនដុល្លារ ហើយម្ចាស់បំណុល 40%សងរួច ម្ចាស់បំណុល 40% កំពុងសងប្រចាំខែ ប្រចាំថ្ងៃតិចៗ ហើយម្ចាស់បំណុល 20% មិនទាន់បានសងសូម្បី1រៀល អ៊ីចឹងហើយសូមម្ចាស់បំណុលដែលនៅសល់មួយចំនួនកុំទាន់សម្រុកមកទារលុយខ្ញុំខ្លាំងពេកអី ខ្ញុំរាល់ថ្ងៃមិនមានលុយដុំសងគេទេគឺខ្ញុំសងគេបានតិចៗ សូមអធ្យាស្រ័យបន្តទៀតផង មួយរយៈនេះផេកមានបញ្ហា TikTok ខូច ចឹងការលក់មានការធ្លាក់ចុះ បើខ្ញុំដកលុយដើមសងបន្តគឺខ្ញុំអស់ដើមគឺចប់ហើយ»៕
