មានករណីដ៏គួរឱ្យហួសចិត្តមួយ ដោយមានគ្រួសារមួយនៅ Havlików Brod សារធារណរដ្ឋឆេក បាននាំគ្នារៀនធ្វើធ្មេញពី Youtube ហើយបើកគ្លីនិកធ្មេញដោយខ្លួនឯងរកលុយបានយ៉ាងស្រួល តែចុងក្រោយបែកធ្លាយការពិត ត្រូវជាប់ទោសមួយគ្រួសារ។
តាមព័ត៌មានបានឱ្យដឹងថា គ្រួសារមួយនេះមានកូនប្រុសវ័យ ២២ ឆ្នាំម្នាក់ ព្រមទាំងឪពុកវ័យ ៤៤ ឆ្នាំ និង ម្តាយវ័យ ៥០ ឆ្នាំ។ គ្រួសារនេះបានបើកគ្លីនិកធ្មេញមួយដោយគ្មានអាជ្ញាប័ណ្ណវេជ្ជសាស្រ្ត ឬ ការបណ្តុះបណ្តាលណាមួយឱ្យត្រឹមត្រូវឡើយ តែពួកគេបានរៀនមកពី Youtube ហើយក៏យកមកបម្រើសេវាកម្មឱ្យភ្ញៀវ។
ក្នុងនោះកូនប្រុសបានដើរតួជាពេទ្យធ្មេញផ្ទាល់ រីឯម្តាយជាអ្នកចាត់ចែងរកថ្នាំ និង ឧបករណ៍ធ្វើធ្មេញទាំងឡាយ ចំណែកឪពុកវិញជាអ្នកធ្វើធ្មេញដាក់ និង ពុម្ពធ្មេញផ្សេងៗ។ គ្លីនិកនេះ មានសេវាកម្មដូចពេទ្យធ្មេញទូទៅ តែគ្រាន់តែមានតម្លៃទាបជាង ដែលធ្វើឱ្យភ្ញៀវជាច្រើនចាប់អារម្មណ៍មកទទួលសេវាកម្មយ៉ាងច្រើនកុះករ ហើយក្រោយពីបើកបានរយៈពេល ២ ឆ្នាំ ពួកគេកើបលុយបានប្រមាណ ១៨៥ ៥០០ ដុល្លារអាមេរិក។
យ៉ាងណាមិញ ក្រោយពីមានការរាយការណ៍ទៅកាន់អាជ្ញាធរពាក់ព័ន្ធ គ្រួសារនេះក៏ត្រូវបានគេឃាត់ខ្លួនកាលពីដើមឆ្នាំ ២០២៥ កន្លងទៅ ក្រោមការចោទប្រកាន់ជាច្រើនដូចជា អាជីវកម្មខុសច្បាប់ ការលាងលុយ ការប៉ុនប៉ងធ្វើបាបរាងកាយ ការជួញដូរគ្រឿងញៀនខុសច្បាប់ (ប្រើថ្នាំសន្លប់ដោយគ្មានអាជ្ញាប័ណ្ណ) និង ចោរកម្ម (ការយកឧបករណ៍ពីមន្ទីរពេទ្យទៅប្រើប្រាស់ផ្ទាល់ខ្លួន) ហើយអាចនឹងជាប់គុករហូតដល់ទៅ ៨ ឆ្នាំ បើសិនជាគេរកឃើញថាមានកំហុសពិតមែន៕
ប្រភព៖ Khaosod
