មហាជនពិតជាស្គាល់ច្បាស់ណាស់នូវរឿងភាគដ៏ល្បី គឺមហាទេពស្មើលមេឃ ស៊ុន អ៊ូខុង ក្នុងឆ្នាំ ១៩៩៦ ដែលទទួលបានការទស្សនាមិនចេះណាយ ហើយថែមទាំងត្រូវបានសរសើរថាជារឿងដែលល្អមើលជាងគេបំផុត ក្នុងចំណោមរឿង ស៊ុន អ៊ូខុង ដែលថតក្រោយៗមកទៀតផងដែរ។
ទាក់ទងនឹងរឿងនេះដែរ រឿងកន្លងទៅ ២៩ ឆ្នាំ ថ្មីៗនេះសារព័ត៌មាន HK01 បានទម្លាយពីជីវិត និង មុខមាត់របស់តារាសម្តែងលោក Kwong Wa បានដើរតួជា ថាំងចេងផងដែរ។ តាមព័ត៌មានបានឱ្យដឹងថា បច្ចុប្បន្ននេះ Kwong Wa មានវ័យ ៦២ ឆ្នាំ និង កំពុងតែរស់នៅយ៉ាងមានសុភមង្គលជាមួយគ្រួសារ ហើយក៏បានឃ្លាតឆ្ងាយពីរង្វង់សិល្បៈទៅហើយដែរ។ ក្នុងនោះ លោកបានចេញពីប៉ុស្តិ៍ TVB នាចុងឆ្នាំ ២០០៦ ក្រោយពីចប់កិច្ចសន្យា ហើយក៏បានចេញផុតពីរង្វង់សិល្បៈតែម្តង ព្រោះតែកាលនោះមានការឈឺចាប់នៅខ្នងជាទម្ងន់ និង មានបញ្ហាផ្លូវចិត្ត ដែលមិនអាចឱ្យលោកធ្វើការបានតទៅទៀត។
ចំពោះរឿងគ្រួសារវិញ Kwong Wa បានរៀបការជាមួយនឹងភរិយាដែលជាតារាចម្រៀងមានវ័យច្រើនជាងខ្លួនដល់ទៅ ៨ ឆ្នាំឯណោះ។ អ្នកទាំងពីរមានកូនប្រុសស្រីចំនួន ២ នាក់ ដែលពួកគេក៏បានពេញវ័យអស់ទៅហើយ ចំណែកបច្ចុប្បន្ននេះ Kwong Wa និង ភរិយាក៏បាននាំគ្នាងាកមក Live លក់អីវ៉ាន់នៅតាម Tik Tok ផងដែរ។
ដោយឡែក ភរិយារបស់លោកបានឱ្យដឹង Kwong Wa ខកចិត្តចំពោះគុណភាពភាពយន្តបច្ចុប្បន្ន តែបើសិនជាមានរឿងដែលលោកចូលចិត្តពិតប្រាកដ លោកក៏នឹងអាចត្រឡប់ទៅសម្តែងម្តងទៀតក៏ថាបាន៕
ប្រភព៖ Sanook
