បុរសចិត្តបុណ្យម្នាក់នៅជប៉ុន ក្នុងវ័យ ៧០ ឆ្នាំ សុខចិត្តបរិច្ចាគមាសសុទ្ធជាង ២០ គីឡូខំសន្សំរាប់ឆ្នាំ ដើម្បីជួយសម្រាលគ្រោះមហន្តរាយ

សារព័ត៌មានរបស់ជប៉ុនមួយបានរាយការណ៍ពីការបរិច្ចាគដ៏មិនគួរឱ្យនឹកស្មានរបស់បុរសម្នាក់ ដែលសុខចិត្តប្រគល់មាស ២០ គីឡូខំសន្សំរាប់ឆ្នាំ តម្លៃប្រមាណ ៣៣០ លានយ៉េន ស្មើប្រមាណ ២.២៨ លានដុល្លារ ដើម្បីជួយសម្រួលដល់ជនរងគ្រោះដោយគ្រោះមហន្តរាយ មនុស្សចាស់ និង ជនពិការ។

លោក Matsui Masataka អភិបាលក្រុង Sakurai ខេត្ត Nara បានឱ្យដឹងថា មានបុរសវ័យ ៧០ ម្នាក់ បានទាក់ទងផ្ញើមាសចំនួន ២០​ ដុំ ដែលមួយដុំមានទម្ងន់ ១ គីឡូក្រាម មកឱ្យខាងសាលាក្រុង ក្រោយពីឃើញថា មានមនុស្សជាច្រើនបានរងគ្រោះក្នុងគ្រោះមហន្តរាយនៅក្នុងទីក្រុង ជាពិសេសគឺចង់ឱ្យមានជំរកកាន់តែប្រសើរសម្រាប់ជនចាស់ជរា និង ជនពិការ នៅពេលដែលមានគ្រោះមហន្តរាយកើតឡើង។

បន្ទាប់ពីទទួលដុំមាសពីបុរសខាងលើ ខាងសាលាក្រុងក៏បានចេញលិខិតអរគុណ​ និង សរសើរទៅកាន់ទឹកចិត្តរបស់បុរសចំណាស់រូបនេះ។ ខាងសាលាក្រុងក៏បានរៀបចំស្នើរឿងនេះទៅកាន់ក្រុមប្រឹក្សាទីក្រុងដើម្បីពិចារណា បើសិនជាទទួលបានការអនុម័ត នោះមាសទាំងនេះនឹងត្រូវលក់យកជាសាច់ប្រាក់មកអភិវឌ្ឍន៍វិធានការបង្ការគ្រោះមហន្តរាយទៅតាមគម្រោង៕

ប្រភព៖ Khaosod