នៅថ្ងៃទី ២៩ ខែកក្កដា ឆ្នាំ ២០២៥ នេះ តាមរយៈសារព័ត៌មានថៃ The Nation បានរាយការណ៍ថា កងទ័ពថៃទទួលស្គាល់បទឈប់បាញ់នៅទូទាំងផ្នែកទាំង ៣ នៃព្រំដែន មុនកិច្ចចរចា GBC ដែលគ្រោងនឹងធ្វើឡើងនៅថ្ងៃទី ៤ ខែសីហា ខាងមុខ។
តាមប្រភពព័ត៌មានដោយផ្អែកលើការបញ្ជាក់ពីកងទ័ពថៃ បានឱ្យដឹងថា ក្រុមមេបញ្ជាការនៅក្នុងផ្នែកទាំង ៣ នៃព្រំដែនរវាងកម្ពុជា និង ថៃ បានឯកភាពគ្នាទៅវិញទៅមក លើបទឈប់បាញ់បន្ទាន់ និង ហាមឃាត់ចលនាកងទ័ពខណៈរង់ចាំកិច្ចប្រជុំ GBC។
ក្នុងនោះដែរ អ្នកនាំពាក្យកងទ័ពថៃ លោក Winthai Suvaree ក៏បានបង្ហើបផងដែរពីលទ្ធផលនៃកិច្ចប្រជុំ និង កិច្ចពិភាក្សារវាងមេបញ្ជាការនៃប្រទេសទាំង ២ នៅថ្ងៃទី ២៩ កក្កដា នេះ ដោយលោកបានបញ្ជាក់ថាស្ថានការណ៍នៅតាមបណ្ដោយព្រំដែន ក៏បានរក្សានូវបទឈប់បាញ់យ៉ាងជោគជ័យមុនកិច្ចចរចានៅថ្ងៃនេះ៕
ប្រភព ៖ Fresh News
