នៅថ្ងៃទី ១៤ ខែកក្កដា ឆ្នាំ ២០២៥ នេះ មហាជនអ្នកគាំទ្រលើបណ្ដាញសង្គម ក៏ដូចជាអ្នកសិល្បៈបានទទួលដំណឹងដ៏សោកស្ដាយ ដែលតារាកំប្លែងជើងចាស់ និង ជាកីឡាករមានរាងតូចល្អិតលោក ប៉ៃ វាសនា បានទទួលមរណភាពហើយ។
បើតាមរយៈការបង្ហោះជូនដំណឹងលើហ្វេសប៊ុករបស់លោក អ៊ឹម ជីវ៉ា បានឱ្យដឹងថាតារាកំប្លែង និង ជាកីឡាកររូបនេះ បានទទួលមរណភាពដោយសារជំងឺមហារីកថ្លើម។ ក្នុងនោះ លោក អ៊ឹម ជីវ៉ា បានរៀបរាប់ថា ៖ «RIP ប្អូន ប៉ៃ វាសនា ជាសិល្បករ និង ជាកីឡាករ បានទទួលមរណភាពហើយ ដោយសារជំងឺមហារីកថ្លើម បងចូលរួមរំលែកទុក្ខសោកស្តាយផងប្អូនអើយ»។
ក្រោយទទួលដំណឹងមរណភាពដ៏ក្រៀមក្រំនេះ មហាជនអ្នកគាំទ្រ និង អ្នកសិល្បៈធ្លាប់រួមការងារជាមួយលោកជាច្រើន បានចែករំលែកភ្ជាប់ជាមួយក្ដីអាណិត និង សោកស្ដាយចំពោះការបាត់បង់សិល្បកររូបនេះផងដែរ៕
