ទឹកដីត្រជាក់ត្រជំ! នៅស្ទឹងត្រែង រកឃើញដើមឈើ អាយុកាលចន្លោះពី «១០ ម៉ឺនឆ្នាំ ទៅ ២ លានឆ្នាំ» ក្នុងស្រុកសេសាន

នៅថ្ងៃទី ១៨ ខែសីហា ឆ្នាំ ២០២៥ នេះ ក្រសួងបរិស្ថាន បានជូនដំណឹងពីករណីកំណាយរកឃើញដើមឈើថ្មមួយដើម ដែលមានអាយុកាលចន្លោះពី ១០ ម៉ឺនឆ្នាំ ទៅ ២ លានឆ្នាំ ដែលត្រូវបានកាយរកឃើញនៅភូមិកាតូត ឃុំភុន ស្រុកសេសាន ខេត្តស្ទឹងត្រែង។ នេះបើតាមការវាយតម្លៃរបស់ លោក លឹម វណ្ណច័ន្ទ មន្ត្រីជំនាញ និង ជាប្រធានការិយល័យបេតិកភណ្ឌវប្បធម៌ នៃនាយកដ្ឋានតំបន់បេតិកភណ្ឌ អគ្គនាយកដ្ឋានសហគមន៍មូលដ្ឋាន ក្រសួងបរិស្ថាន។

តាមប្រភពបានឱ្យដឹងទៀតថា តាមរយៈកិច្ចសហការចូលរួមពីរដ្ឋបាលស្រុកសេសាន មន្ទីរវប្បធម៌ខេត្តស្ទឹងត្រែង មន្ទីរបរិស្ថានខេត្តស្ទឹងត្រែង និង អ្នកជំនាញក្រសួងបរិស្ថាន បានធ្វើកំណាយស្រាវជ្រាវដើមឈើថ្មនេះ ដែលជាលទ្ធផលបឋម កំណាយបានប្រវែង ១៧.៥ ម៉ែត្រ។ ក្នុងនោះ អ្នកជំនាញ គូសបញ្ជាក់ឱ្យដឹងទៀតថា សម្រាប់ដើមឈើថ្មនេះ អាចមានប្រវែងប្រហែល ៣០ ម៉ែត្រ ឬ វែងជាងនេះ ដោយកំណាយមិនទាន់រួចរាល់។

តាមប្រភពបានបន្តថា ដើមឈើនេះកប់ក្នុងស្រទាប់ដីឥដ្ឋ និង ថ្មបាយក្រៀម ខណៈបច្ចុប្បន្នកិច្ចការងារកំណាយនេះនៅមិនទាន់ចប់នៅឡើយទេ ដែលនឹងបន្តធ្វើនៅឆ្នាំក្រោយទៀត ហើយទីតាំងដើមឈើថ្មនេះ នឹងរៀបចំទៅជាកន្លែងទេសចរណ៍របស់សហគមន៍ជនជាតិដើមព្រៅផងដែរ៕

ប្រភព ៖ Ministry of Environment