ថ្មីៗនេះ អ្នកនិយមតាមដានវិស័យសិល្បៈបុរាណ ច្បាស់ជាបានជ្រាបមកហើយពីស្ថានភាពជំងឺរបស់លោក ឈឺន ឃីម ហៅ ណាឃីម ដែលកំពុងធ្លាក់ខ្លួនឈឺខ្លាំងដោយក្រុមគ្រួសារបានឱ្យដឹងបឋមថា លោក ណាឃីម មានជំងឺរលាកស្រោមខួរ, រលាកសួតធ្ងន់ធ្ងរ និង ក្រពះពោះវៀន។ បច្ចុប្បន្ន លោក ណាឃីម មានអាការវង្វេង ភ្នែកមើលលែងឃើញ ត្រចៀកស្តាប់លែងឮ នោមមិនចេញ និង បាយមិនបានផងដែរ។
យ៉ាងណាមិញ ដោយអាការកាន់តែធ្ងន់ធ្ងរ កាលពីរសៀលថ្ងៃទី ១៤ ខែតុលា ឆ្នាំ ២០២៥ កន្លងទៅនេះ តាមរយៈការបង្ហោះវីដេអូ និង ឱ្យដឹងពីមិត្តភក្តិក្នុងវិស័យសិល្បៈបុរាណ គឺលោក ព្រហ្ម ប្រសិទ្ធី បានឱ្យដឹងថា លោក ណាឃីម បានបញ្ជូនទៅដល់មន្ទីរពេទ្យនៅប្រទេសវៀតណាមហើយ ដោយមានរូបលោករួមដំណើរទៅជាមួយ។
ក្រោយទៅដល់មន្ទីរពេទ្យនៅប្រទេសវៀតណាម លោក ព្រហ្ម ប្រសិទ្ធី បានជម្រាបពីអាការលោក ណាឃីម អាចនឹងធូរស្រាលក្រោយទទួលបានការព្យាបាលនៅទីនោះ ប៉ុន្តែនៅព្រឹកថ្ងៃទី ១៧ ខែតុលា ឆ្នាំ ២០២៥ នេះ មហាជនស្លុតចិត្តយ៉ាងខ្លាំង ដោយអ្នកមើលថែនៅក្បែរលោក ណាឃីម នៅវៀតណាម បានឱ្យដឹងថា លោក ណាឃីម នឹងត្រូវបញ្ជូនត្រលប់មកស្រុកកំណើតវិញ ខណៈគ្រូពេទ្យប្រាប់សាច់ញាតិឱ្យត្រៀមចិត្ត។
ជាមួយអារម្មណ៍អួលណែន អ្នកមើលថែលោក ណាឃីម បានរៀបរាប់ទាំងក្ដុកក្ដួលថា ៖ «ខ្ញុំពិបាកទទួលយក ពាក្យថា ឱ្យខ្ញុំត្រៀមចិត្ត បែបនឹងណាស់ ខ្ញុំនៅក្បែរគាត់មួយរយៈពេលនេះគឺខ្ញុំទទួលបានអារម្មណ៍ដែលមិនអាចឱ្យខ្ញុំត្រៀមចិត្ត បែបនឹងទេ ខ្ញុំញ័រដៃជើងអស់ហើយ ខ្ញុំធ្វើអីមិនកើតទេ បងប្អូនដែលចង់មើលគាត់អាចនឹងល្ងាចនេះ គឺគាត់ទៅស្រុកវិញហើយ»៕
សូមចុចទីនេះ ដើម្បីទស្សនាវីដេអូ៖
