មានរឿងរ៉ាវមួយដែលកំពុងធ្វើឱ្យមហាជននៅតាមបណ្តាញសង្គមក្នុងប្រទេសថៃ ផ្ទុះការហួសចិត្តជាខ្លាំង ដោយមានបុរសម្នាក់ត្រូវឆ្នោតជាង ១ ម៉ឺនដុល្លារ ប្រពន្ធប្រាប់ថាទៅបើកលុយឱ្យ តែស្រាប់តែនាងវេចបង្វេចយកលុយរត់បាត់។
តាមព័ត៌មានបានឱ្យដឹងថា បុរសជាប្តីគឺជាបុគ្គលិករោងចក្រម្នាក់ ហើយនៅថ្ងៃមួយគេសំណាងល្អបានត្រូវឆ្នោតចំនួន ៤ សែនបាត ដែលស្មើប្រមាណជាង ១ ម៉ឺនដុល្លារ។ ក្នុងនោះស្រ្តីជាប្រពន្ធក៏បានប្រាប់ថា ចាំនាងជាអ្នកទៅបើកលុយ ឱ្យប្តីធ្វើការចុះ តែគ្រាន់តែនាងចេញទៅប្តីក៏ទាក់ទងនាងលែងបាន ហើយពេលចេញពីធ្វើការក៏ប្រញាប់រត់ទៅមើលនៅបន្ទប់ជួលក៏ឃើញថា នាងបានវេចបង្វេចរត់ទៅបាត់ ដោយបន្សល់ត្រឹមសំបុត្រមួយច្បាប់ និង លុយប្រមាណជាង ១៤០០ ដុល្លារឱ្យប៉ុណ្ណោះ។
យ៉ាងណាមិញ នៅក្នុងសំបុត្រនោះនាងបានប្រាប់ថា នាងអស់ក្តីស្នេហាហើយ នាងសុំយកលុយនេះទៅចាប់ផ្តើមថ្មី ហើយក៏មិនបាច់តាមរកនាងនោះទេ។ ចំណែកបុរសជាប្តីក៏បានទាក់ទងឱ្យគេតាមប្រកាសរកប្រពន្ធ តែនាងជាប្រពន្ធក៏បានតបមកថា ប្តីរបស់នាងជាមនុស្សគំរិះខ្លាំងណាស់ តែគំរិះយកលុយទៅលេងល្បែង នាងទ្រាំមិនបានទៀតឡើយ នាងសារភាពថានាងមានអ្នកថ្មី តែនាងធ្វើនេះដើម្បីអនាគតខ្លួនឯងតែប៉ុណ្ណោះ៕
ប្រភព៖ Sanook
