នៅថ្ងៃទី ០៦ ខែមីនា ឆ្នាំ ២០២៥ លោក អ៊ុក វណ្ណដេ ដែលជាស្ថាបនិកទេសចរណ៍អំណាន បានសម្ដែងនូវក្ដីរំភើប បន្ទាប់ពីប្រជាពលរដ្ឋខេត្តព្រៃវែង បានបង្កើតប្រវត្តិសាស្រ្តឱ្យជីវិតលោក គឺជាខេត្តដំបូង (បិទផ្លូវនាំគ្នាអានសៀវភៅ) មុនគេ ជាគំរូ និង ជាមោទកភាពគួរឱ្យសាទរក្រៃលែង។
ក្នុងនោះ បើតាមការឱ្យដឹងពីគណនី ស្ថាបនិកទេសចរណ៍អំណានរូបនេះ បានឱ្យដឹងថា ក្រោមម្លប់សន្តិភាព បងប្អូនប្រជាពលរដ្ឋខេត្តព្រៃវែង បានបង្កើតរូបភាពដ៏មានន័យ និង មានតម្លៃចំពោះសង្គមជាតិ នៅក្នុងទេសចរណ៍អំណាន ខេត្តទី ៦ ដែលមានការលើកទឹកចិត្តពីសំណាក់ថ្នាក់ដឹកនាំ មានលោកអភិបាលខេត្តព្រៃវែង និង លោកជំទាវដែលបានដឹកនាំមន្រ្តីរដ្ឋបាលខេត្ត និង ប្រជាជនមកលើកទឹកចិត្តទេសចរណ៍អំណានរបស់លោក។
លោក អ៊ុក វណ្ណដេ បានបន្តឱ្យដឹងថា ចំពោះការចូលរួមទេសចរណ៍អំណាន ក្នុងខេត្តទី ៦ គឺបងប្អូនអ្នកខេត្តព្រៃវែង បាននាំគ្នាអានយ៉ាងស្ងាមស្ងាត់ លើវីថីសន្តិភាព បានរយៈពេល ១ ម៉ោង ៤៦ នាទី៕
