ជាការពិតណាស់ មហាជននិយមតាមដានវិស័យបវរកញ្ញានៅក្នុងប្រទេសកម្ពុជាច្បាស់ជាបានជ្រាបហើយថា បច្ចុប្បន្នមិនត្រឹមតែបវរកញ្ញាជាភេទនារីនោះទេដែលលេចធ្លោក្នុងវិស័យនេះ ពោលគឺសូម្បីបវរកញ្ញាភេទទី ៣ ក៏ត្រូវបានមហាជនផ្ទុះការគាំទ្រខ្លាំងផងដែរ។
ក្នុងនោះ នៅក្នុងប្រទេសកម្ពុជាបានរៀបចំកម្មវិធីបវរកញ្ញាភេទទី ៣ យ៉ាងជោគជ័យ រីឯបវរកញ្ញាភេទទី ៣ ជាច្រើនបានឈានជើងឡើងទៅកាន់ឆាកអន្តរជាតិតំណាងឱ្យកម្ពុជាទៀតផង។ លើសពីនោះ សូម្បីតែកម្មវិធីប្រកួតលំដាប់ពិភពលោក ក៏បេក្ខភាពភេទទី ៣ មានសិទ្ធិចូលរួមប្រកួតជាមួយនឹងបេក្ខភាពជានារីពិតដែរ។
ដោយឡែក ស្របពេលបវរកញ្ញាភេទទី ៣ នៅកម្ពុជាកំពុងលេចធ្លោ និង ទទួលបានមកុដក្នុងតំណែងជាច្រើននោះ មហាជននៅចាំដែរទេពីបវរកញ្ញាភេទទី ៣ ដំបូងបង្អស់របស់កម្ពុជាកាលពីជាង ២០ ឆ្នាំ មុន?
ងាកទៅកាន់ឆ្នាំ ២០០២ អាចនឹងមានមហាជនខ្លះបានភ្លេច រីឯក្មេងៗស្រករក្រោយប្រាកដជាមិនបានជ្រាបនោះឡើយថា បវរកញ្ញាភេទទី ៣ ដែលបានគ្រងមកុដក្នុងកម្មវិធីប្រកួតបវរកញ្ញាភេទទី ៣ ដំបូងបង្អស់របស់កម្ពុជា គឺកញ្ញា លាង សុធា ហៅ ប៉ុបពី នៅក្នុងកម្មវិធី «នាទីចុងក្រោយ» រៀបចំឡើងដោយស្ថានីយ៍ទូរទស្សន៍ជាតិកម្ពុជា (ទទក)។ បច្ចុប្បន្ន កញ្ញា ប៉ុបពី មិនត្រឹមតែមានការងារជាច្រើនជំនាញក្នុងអាជីពសិល្បៈនោះទេ កញ្ញា ប៉ុបពី ក៏ជាអ្នកផាត់មុខដ៏មានស្នាដៃម្នាក់ដែរ៕
