បើរំឭកកាលពីប្រមាណ ២០ ឆ្នាំមុន ពោលគឺចាប់ពីឆ្នាំ ២០០៥ ឡើង មហាជននិយមទស្សនារឿងភាគបែបបុរាណខ្មែរ ច្បាស់ជាបានស្គាល់នូវតារាសម្តែងប្រុសស្រស់សង្ហាលោក ស៊ុម សុជាតិ ដែលរមែងដើរជាតួឯកប្រុស និង តួឯកសំខាន់ៗក្នុងភាពយន្ត។
ក្នុងនោះ ខ្សែភាពយន្តដែលអតីតតារាប្រុសខាងលើចូលរួមសម្តែង និង ទទួលបានប្រជាប្រិយភាពរួមមានរឿង «នគរស្រីល្វរ» រឿង «ព្រះថោងនាងនាគ» រឿង «សំពោងសក់ធំ» និង រឿង «រៀមកេរ្តិ៍» ជាដើម។ កាលនោះ គេចាំបានថាលោក ស៊ុម សុជាតិ គឺជាតារាប្រុសជំនាន់ លោក ស៊ុក សុភា, អ្នកនាង សាន សុម៉ាលី ជាដើម។
យ៉ាងណាមិញ បើគិតដល់ពេលនេះរយៈពេលប្រមាណជា ១៥ ឆ្នាំមកហើយ ដែលលោក ស៊ុម សុជាតិ បានចាកឆ្ងាយពីសិល្បៈ បន្ទាប់ពីលោកបានរៀបការសាងគ្រួសារកាលពីអំឡុងឆ្នាំ ២០១០។ បច្ចុប្បន្ន លោក ស៊ុម សុជាតិ ទទួលបានចំណងដៃកូនប្រុសស្រីចំនួន ២ រូប រីឯការងារវិញលោកក៏ជាមន្ត្រីមួយរូបក្នុងក្រសួងមហាផ្ទៃផងដែរ៕
