ទាក់ទងនឹងជីវិតឯកជនរបស់ MUC ប៉ុន្មានជំនាន់ កំពុងទទួលបានការចាប់អារម្មណ៍ខ្លាំងពីមហាជនជាមួយរឿងរ៉ាវស្នេហាដ៏ផ្អែមល្ហែមរបស់ពួកគេ ដែលបានបើកបង្ហាញម្ចាស់បេះដូងចាប់ដៃគ្នាជាគូជីវិត និង បានរៀបការសាងគ្រួសារយ៉ាងមានក្ដីសុខ ព្រមទាំងត្រៀមកាន់ដៃគ្នាលាស្រុកកំណើតទៅរស់នៅក្រៅប្រទេសទៀតផង។
១. រឿន ណាត Miss Universe Cambodia 2018
ចាប់តាំងពីបានរៀបចំកម្មវិធីភ្ជាប់ពាក្យនៅក្នុងស្រុកកាលពីចុងខែធ្នូ ឆ្នាំ ២០២៤ កន្លងទៅ ឃើញថាបវរកញ្ញា រឿន ណាត និង បុរសឯកលោក លាង វេងហួរ បានស្ងប់ស្ងាត់ខ្លាំងពីសកម្មភាពការងារសិល្បៈ ដោយភាគច្រើនឃើញបង្ហាញសកម្មភាពនៅតែក្រៅប្រទេស គឺនៅឯសហរដ្ឋអាមេរិក ដែលបានដឹកដៃគ្នាទៅដើរលេងកម្សាន្តសាងក្ដីសុខយ៉ាងផ្អែមល្ហែមទៅទីនោះ។ យ៉ាងណាមិញ មកដល់ថ្ងៃទី ៩ ខែឧសភា ឆ្នាំ ២០២៥ កន្លងទៅនេះ បវរកញ្ញា រឿង ណាត និង លោក លាង វេងហួរ បានធ្វើឱ្យអ្នកគាំទ្រផ្ទុះចាប់អារម្មណ៍ និង ចូលរួមអបអរ ខណៈស្ងាត់ៗបានឃើញអ្នកទាំងពីរបង្ហាញរូបភាពរៀបការបែបបស្ចឹមប្រទេសយ៉ាងសាមញ្ញនៅសហរដ្ឋអាមរិក។ មិនត្រឹមប៉ុណ្ណោះ ក្រោយសម្រេចរៀបការក្លាយជាប្ដីប្រពន្ធស្របច្បាប់ ពេលនេះដែរ អ្នកទាំងពីរ ក៏បន្តបង្ហាញសកម្មភាពចាប់ដៃគ្នារស់នៅលើទឹកដីសហរដ្ឋអាមេរិក ត្រៀមសាងជីវិតគ្រួសារយ៉ាងមានក្ដីសុខនៅទីនោះផងដែរ។
២. ងិន ម៉ារ៉ាឌី Miss Universe Cambodia 2021
ចំពោះអ្នកនាង ងិន ម៉ារ៉ាឌី រយៈពេលជាង ៣ ឆ្នាំហើយ ដែលនាងបានលាភាពនៅលីវរៀបការសាងគ្រួសារជាមួយស្វាមីអាណិកជនអាមេរិករូបសង្ហា និង ទទួលបានកូនស្រីដ៏គួរឱ្យស្រឡាញ់ម្នាក់ជាចំណងដៃអាពាហ៍ពិពាហ៍។ ចាប់តាំងពីសម្រេចចិត្តសាងជីវិតគ្រួសារកន្លងមក ងិន ម៉ារ៉ាឌី ត្រូវគេចាប់អារម្មណ៍ឃើញថានាងទទួលបានក្ដីសុខសុភមង្គលយ៉ាងពេញលេញ និង មានភាពកក់ក្ដៅខ្លាំង ដែលមានស្វាមីពូកែយល់ចិត្ត គោរពស្រឡាញ់ មើលថែយកចិត្តទុកដាក់ខ្លាំងចំពោះនាង។ លើសពីនេះ ដ្បិតតែមួយរយៈក្រោយ អ្នកនាង ងិន ម៉ារ៉ាឌី បានវិលត្រឡប់មកបំពេញការងារសិល្បៈ និង វិស័យបវរកញ្ញាវិញមែន ប៉ុន្តែនាងក៏ធ្លាប់បង្ហើបប្រាប់ទាក់ទងនឹងរឿងជីវិតឯកជន ដែលពេលនេះកំពុងត្រៀមខ្លួនចេញទៅរស់នៅឯសហរដ្ឋអាមេរិកជាមួយគ្រួសារស្វាមី និង ចាប់អាជីពថ្មីមួយនៅទីនោះទៀតផង៕
