មង្គលការដ៏ធំកក្រើកពិភពសិល្បៈរវាងកំពូលតារាចម្រៀងរ៉េប ងួន ចាន់ដេវីត និង អ្នកនាង ទេព បូព្រឹក្ស បានបញ្ចប់ទៅដោយរលូនកាលពីថ្ងៃទី ៧ ខែមិថុនា ឆ្នាំ ២០២៥ ក្រោមវត្តមានចូលរួមដ៏ខ្ពង់ខ្ពស់ជាសំណាក់ភ្ញៀវកិត្តិយសជាច្រើនដែលមានទាំងថ្នាក់ដឹកនាំកំពូលៗ ក៏ដូចជាសិល្បករ សិល្បការិនីលំដាប់ប្រទេស។
ដូចប្រិយមិត្តបានជ្រាបហើយថា មុនពេលរៀបចំពិធីមង្គលការតាមប្រពៃណី តារាប្រុសស្រីទាំងពីររូបនេះ បានចុះសំបុត្រអាពាហ៍ពិពាហ៍ក្លាយជាប្ដីប្រពន្ធស្របតាមផ្លូវច្បាប់រួចរាល់ហើយ ហើយពួកគេថែមទាំងទទួលបានកូនប្រុសដ៏គួរឱ្យស្រឡាញ់ម្នាក់ឈ្មោះ Albert ជាចំណងដៃទៀតផង ដែលបច្ចុប្បន្នកំលោះតូចរូបនេះមានអាយុជាង ២ ឆ្នាំហើយ។
ខណៈកូនប្រុសច្បងកាន់តែធំដឹងខុសត្រូវ កន្លងមកអ្នកម៉ាក់សម័យថ្មី ទេព បូព្រឹក្ស ក៏ធ្លាប់បង្ហើបចង់បានប្អូនឱ្យអូន Albert ម្នាក់ទៀតផងដែរ។ ទន្ទឹមនឹងនោះ អ្វីដែលធ្វើឱ្យអ្នកគាំទ្រចាប់អារម្មណ៍ ថ្មីៗនេះ លោក ជី ដេវីត បានបង្ហើបពីបំណងចង់បានកូនដល់ទៅ ៥ នាក់ឯណោះប្រាប់អ្នកគាំទ្រ ដោយលោកលើកឡើងទាំងស្នាមញញឹមថា លោកចង់ឱ្យនៅផ្ទះមានកូនច្រើនទើបសប្បាយ។
ងាកមកកូនក្រមុំថ្មីថ្មោង គឺអ្នកនាង ទេព បូព្រឹក្ស ឯណោះវិញ ពេលគេសួរដល់គម្រោងនៅថ្ងៃអនាគតចង់បានកូនប៉ុន្មាននាក់ ស្រាប់តែអ្នកនាងឆ្លើយតបដោយមិនស្ទាក់ស្ទើរថា ចង់បានកូនរហូតដល់ ៧ នាក់ ដែលនេះជាបំណងផ្ទាល់របស់អ្នកនាង៕
