កម្មវិធីប្រកួតធ្វើម្ហូប MasterChef Cambodia បាន និង កំពុងផ្ដើមរដូវកាលថ្មី ដែលជារដូវកាលទី ៤ ហើយ ដោយនៅក្នុងការចាប់ផ្ដើមនេះ គេសង្កេតឃើញការប្រកួតរបស់បេក្ខជន បេក្ខនារីទាំងអស់ បានបង្ហាញសមត្ថភាពយ៉ាងស្វិតស្វាញដើម្បីអាចបោះជំហានទៅកាន់វគ្គបន្តបន្ទាប់ទៀត។
ងាកមកវត្តមានរបស់គណៈកម្មការទាំង ៣ រូបនេះ គឺមិនសុខពីរដូវកាលទី ៣ ឡើយ ដោយមាន Chef ណារ៉ា, Chef ម៉េងហ៊ី និង កញ្ញា ជេស៊ីកា នៅតែទទួលបានតំណែងជាគណៈកម្មការវិនិច្ឆ័យ កាត់សេចក្ដី និង ដាក់បន្ទុកលើការចម្អិនម្ហូបរបស់បេក្ខជននីមួយៗដដែល ដើម្បីធ្វើការចម្រាញ់រកបេក្ខជនដ៏ស័ក្ដិសមមួយរូបដែលមានគំនិតច្នៃប្រឌិតខ្ពស់ មានភាពរហ័សរហួន ក្នុងការបញ្ចេញថ្វីដៃធ្វើម្ហូបឱ្យមានរសជាតិ និង ការតុបតែងលេចធ្លោជាងគេ ដើម្បីឆ្ពោះទៅរកពានរង្វាន់លេខមួយ។
ដោយឡែក ក្រៅពីទេពកោសល្យផ្នែកធ្វើម្ហូបរបស់បេក្ខជននីមួយៗក្នុងរដូវកាលថ្មីនេះ មហាជនអ្នកគាំទ្រនៅតែចាប់អារម្មណ៍ទៅលើគណៈកម្មការស្រីដ៏ស្រស់សោភា គឺកញ្ញា ជេស៊ីកា ដែល ៤ រដូវកាលមកនេះ កញ្ញានៅតែក្ដោបបានតំណែងជាគណៈកម្មការស្រីតែម្នាក់គត់ ដែលមានទាំងសម្រស់ ចំណេះដឹងផ្នែកម្ហូបអាហារ និង ភាពម៉ឹងម៉ាត់ក្នុងការដាក់ពិន្ទុ ដែលធ្វើឱ្យកញ្ញាស័ក្ដិសមនឹងទទួលបានតំណែងមួយនេះបំផុត៕
